«Աշխատավարձերի հարաբերակցության խնդիրը իրոք կա: Եթե ճիշտ եմ հիշում՝ խորհրդային տարիներին բուժաշխատողների աշխատավարձերը ավելի բարձր էին, քան ուսուցիչներինը։ Հիմա պետք է ոչ թե իջեցնել ուսուցիչների աշխատավարձը, այլ բարձրացնել բժիշկներինը»,- նման հայտարարություն այսօր ԱԺ մշտական հանձնաժողովների համատեղ նիստի ժամանակ արեց ֆինանսների փոխնախարար Պավել Սաֆարյանը՝ ի պատասխան ՀՅԴ պատգամավոր Արծվիկ Մինասյանի դիտարկմանը, որ բուժաշխատողների իրական աշխատավարձը միջինում 50 հազ. դրամ է, այսինքն` դրանից ցածր վարձատրվողներ նույնպես կան։
Հարցին՝ աշխատավարձերի վերահաշվարկ կատարվե՞լ է՝ հաշվի առնելով առկա բնակչության թիվը, որը հայտարարվեց նաև մարդահամարի տվյալներով, Պ. Սաֆարյանը պատասխանեց, որ բնակչության իրական թվով վերաբաշխում կատարվելու է, հատկացումները իրականացվում են ըստ հիվանդների բուժման։
Ա. Մինասյանը, մատնանշելով վերջին շրջանում դեղերի գնումների ոլորտների բացահայտումները, հետաքրքրվեց՝ արդյո՞ք դա հաշվի առնվել է դեղերի գնումների համար հատկացումների ցուցանիշների հաշվարկի ժամանակ։ Փոխնախարարը տեղեկացրեց, որ եթե գումարների տնտեսում լինի, իրենք կկարողանան ավելի շատ դեղեր գնել։ Դեղերի գնման պլանը դեկտեմբերի վերջին հաստատվում է կառավարության որոշմամբ։
Լուսանակրը՝ PanARMENIAN Photo-ի
