Կարևորելով մեր ազգային ինքնության արժեքները` Հայ գրատպության 500-ամյակի և Երևանը գրքի համաշխարհային մայրաքաղաք հռչակման ծրագրի շրջանակներում Հայկական գրադարանային ասոցիացիան, Երաժշտագիտական և Խնկո Ապոր անվան ազգային մանկական գրադարանները ՀՀ մշակույթի նախարարության աջակցությամբ իրականացնում են «Երաժշտությունը և երաժշտական գրադարանները 21-րդ դարում» խորագրով գիտաժողովը` նվիրված Սայաթ-Նովայի 300- ամյակին: Հատկանշական է,որ այս տարի ՅՈՒՆԵՍԿՕ-ն 18-րդ դարի հայ մեծանուն կոմպոզիտոր և բանաստեղծ Սայաթ-Նովայի ծննդյան 300-ամյակը ընդգրկել է հռչակավոր մարդկանց և տարվա կարևորագույն իրադարձությունների իր ցանկում: «Երաժշտությունը և երաժշտական գրադարանները 21-րդ դարում» խորագրով գիտաժողովը կանցկացվի նոյեմբերի 1-3-ը ՝Երևանում,Խնկո Ապոր անվան գրադարանում:
Գիտաժողովը նպատակ ունի հասարակությանը վերադարձնել իր հոգևոր արմատներին, նպաստել երաժշտական գրադարանների զարգացմանը,ազգային երաժշտության դերի բարձրացմանն ու երաժշտական արժեքների հանրահռչակմանը,հայ երաժշտական մշակույթի քարոզչությանը,ինչպես նաև նոր սերնդի ստեղծագործական ներուժի բացահայտմանը:Միջազգային երևանյան հավաքին մասնակցում են տարբեր երկրներից ժամանած երաժիշտներ,հայտնի արվեստագետներ ու մտավորականներ:Գիտաժողովի բացման առիթով համաժողովի մասնակիցներին կողջունեն ՀՀ մշակույթի նախարար Հասմիկ Պողոսյանն ու IAML պրեզիդենտ Ռոջեր Ֆլուրը: Գիտաժողովի աշխատանքային օրակարգում կանցկացվեն «Երաժշտական գրադարանները թվայնացվող աշխարհում. հիմնախնդիրներ և հեռանկարներ» և «Երաժշտական գրադարանների ազգային ցանցի ստեղծում» թեմաներով մասնագիտական քննարկումներ/բանախոսներ Մայքլ Ֆինգերհաթ՝ Բիբլիոմուս, Ֆրանսիա և Մասսիմո Ջենթիլի-Տեդեսկի ՝ Միլանի ազգային գրադարան, Իտալիա:
Համաժողովի ընթացքում կանցկացվեն նաև Սայաթ-Նովային և նրա ստեղծագործական ժառանգությանը նվիրված մի շարք միջոցառումներ: «Սայաթ-Նովան` Կովկասի Մոցարտ.թարգմանական արվեստի նրբությունները» թեմայով դասախոսությամբ հանդես կգա ավստրիացի գրող,հայագետ և թարգմանիչ Հերբերտ Մաուրերը,ինչպես նաև Փարաջանով թանգարանում կանցկացվի «Սայաթ-Նովան Փարաջանովի հայացքով» միջոցառումը,իսկ Վիեննայի ջազ-տրիոն՝ Քրիստոֆ Չեխի գլխավորությամբ կներկայանա Սայաթ-Նովայի ստեղծագործությունների մշակումնեըից բաղկացած համերգային ծրագրով:
