Ինտերնետից երաժշտություն ներբեռնողները Չինաստանում այսուհետ ստիպված կլինեն վճարել: Արդեն հաջորդ տարվա սկզբից չինական երաժշտական ինտերնետ-պորտալները կսկսեն գումար գանձել աուդիո ֆայլերի ներբեռնման համար: Այս մասին հայտնում է China Daily-ն:
Անսահմանափակ քանակով երգերի ներբեռնման ամսական բաժանորդագրությունը կարժենա 1,6-2,4 դոլար: Վճարն այնքան էլ մեծ չէ, շատերը պատրաստ են վճարել ներբեռնումների դիմաց: Սակայն մի շարք փորձագետներ կարծում են, որ չինացի սպառողը սովորել է համացանցից անվճար երաժշտություն ստանալուն, և նրանց դժվար կլինի այլ մոդելին ադապտացվել:
Ինտերնետ-պորտալների տերերը փոխզիջումների են գնում և նախկինի պես օնլայն լսումները անվճար թողնում: Ներբեռնվող երաժշտական ֆայլերի վճարովի համակարգ ստեղծելու գաղափարին արդեն աջակցել են մի շարք անկախ չինացի արտիստներ, որոնց կարծիքով՝ նորարարության շնորհիվ երգիչների հոնորարները կավելանան: Ներկայում նրանք գումար են ստանում միայն «կենդանի» ելույթից:
