Գերմանական Handelsblatt թերթի փոխանցմամբ՝ գերմանաբնակ թուրքերն ամեն տարի Թուրքիա են ուղարկում մոտ մեկ միլիարդ եվրո: Գերմանիայում բնակվող գրեթե յուրաքանչյուր երրորդ թուրքը կանոնավորապես կամ ժամանակ առ ժամանակ գումար է փոխանցում հայրենիքում մնացած իր հարազատներին:
Մեկ մարդու կտրվածքով միջին հաշվարկով տարեկան դա կազմում է 1300 եվրո, ինչը, ընդհանուր առմամբ, գերմանաբնակ ողջ թուրքական համայնքի դեպքում տարեկան կազմում է մոտ 1 միլիարդ եվրո: Ընդ որում` Թուրքիա փոխանցվող գումարի մի մասը ոչ թե վտարանդիների աշխատավարձի ավելցուկն է, այլ՝ գերմանական իշխանությունների կողմից նրանց հատկացվող սոցիալական նպաստի գումարը:
Գերմանաբնակ թուրքերի 17 տոկոսը ֆինանսական օգնություն է ստանում պետությունից: Հարցվածների միայն 57 տոկոսն է հայտարարել, որ ապրում է սեփական վաստակով: Բացի գումարից, գերմանաբնակ թուրքերն իրենց հայրենակիցներին ուղարկում են տարբեր ապրանքներ, սարքեր և գործիքներ, ինչպես նաև սննդամթերք: Միջին հաշվարկով այդպիսի նյութական օգնությունը մեկ մարդու կտրվածքով կազմում է մոտ 250 եվրո:
Եվ քանի որ նման կերպ է վարվում թուրք ներգաղթյալների 18 տոկոսը, ապա, ընդհանուր առմամբ, տարեկան Թուրքիա ուղարկվող այդպիսի նյութական օգնության ծավալը կազմում է մոտ 90 միլիոն եվրո:
Նշվում է, որ գումարների կանոնավոր փոխանցումները և հայրենիքի հետ ներգաղթյալների մեծ մասի կողմից ամուր կապեր պահպանելը հանգեցրել է նրան, որ նրանցից շատերը չեն շտապում Գերմանիա մեկնելուց հետո վաճառել Թուրքիայում ունեցած իրենց անշարժ գույքը: Միջին հաշվարկով գերմանաբնակ թուրքերը տարեկան 1.9 անգամ ժամանում են հայրենիք, և գրեթե չորրորդ թուրքը 3-4 տարին մեկ վերադառնում է Թուրքիա:
