Ինչպես հաղորդում է ճապոնական NHK հեռուստաալիքը, Ճապոնիայի կառավարությունը Ֆուկուսիմայի վթարված ատոմակայանի շրջակա տարածքներից տարհանման շառավիղը ընդլայնել է 10-կմ-ից մինչև 30 կմ (մինչ այդ որոշում կար միայն 20 կմ-ի վերաբերյալ): Տեղեկություններ կան, որ ոստիկանությունը հսկողություն է սահմանել սկսած 60 կմ շառավղից:
Ակնհայտ է, որ վթարը ատոմակայանում լուրջ է, թեպետ Ճապոնիայի միջուկային անվտանգության գործակալության տեղեկություններով, ռադիացիոն ֆոնը ատոմակայանի շրջակայքում սկսել է կայունանալ:
Հիշեցնենք, որ մոտ երկու ժամ առաջ Ֆուկուսիմայի ատոմակայանում տեղի է ունեցել հզոր պայթյուն, որի հետևանքով փլուզվել են առաջին էներգաբլոկի տանիքն ու պատը:
Ճապոնիայի կառավարությունը հայտնել է, որ ռեակտորը դրանից չի տուժել, սակայն ստացված տեղեկություններով` վնասը բավականին մեծ է: Այս մասին մասնավորապես ասել է Ճապոնիայի կառավարության գլխավոր քարտուղար Յուկիո Էդանոն: