ՀՀԿ-ի և ԲՀԿ-ի միջև այժմ իրական հակասություն կա. այսօր լրագրողների հետ հանդիպմանը նման տեսակետ հայտնեց Տարածաշրջանային հետազոտությունների կենտրոնի տնօրեն, վերլուծաբան Ռիչարդ Կիրակոսյանը:
«Եթե անգամ ԲՀԿ-ն թեկնածու չառաջադրի նախագահական ընտրություններում, այնուամենայնիվ, հակասությունն իրական է: Ամենթարմ օրինակը Օսկանյանի դեպքն է»,- ասաց նա:
Ռիչարդ Կիրակոսյանի խոսքերով` այս հակասությունը կարող է հանգեցնել իրական մարտահրավերի, եթե երկու քաղաքական ուժերն էլ թեկնածու առաջադրեն առաջիկա նախագահական ընտրություններում: «Բայց իրականում չգիտեմ, թե ինչ են մտածում այս ուժերը, եթե, իհարկե, մտածում են: Ես իրականում ոչ մի քաղաքական արշավ չեմ տեսնում: Ավելի շատ տեսնում եմ քաղաքական հոբբի, քան քաղաքական լուրջ ընտրարշավ: Ես Գագիկ Ծառուկյանի ընկերը չեմ, դեմ եմ Ռուբեն Հայրապետյանին: Մենք այսօր շատ մեծ օլիգարխների ազդեցություն ունենք, ավելին մեզ պետք չէ»,- ընդգծեց բանախոսը:
Ռիչարդ Կիրակոսյանը կանխատեսում է, որ այս նախագահական ընտրություններում իրական մրցակցություն կլինի: Նախորդ անգամ, ըստ նրա, կային կեղծ թեկնածուներ, ինչպես օրինակ` Արտաշես Գեղամյանը: Ըստ բանախոսի`չնայած սրան, Սերժ Սարգսյանը կվերընտրվի, քանի որ այս հարցում դեր կխաղան ադմինիստրատիվ ռեսուրսները, ինչպես նաև այլընտրանքային թեկնածուի բացակայությունը:
Ռչարդ Կիրակոսյանն անհավանական է համարում ԲՀԿ և ՀԱԿ դաշինքի ձևավորումը: Անդրադառնալով ՀԱԿ-ի մարտավարությանը` նա նշեց. «Դավիթ Շահնազարյանը շատ խելացի քայլ կատարեց, որ դուրս եկավ այս ընդհանուր գործընթացից»:
