Երեկ Նյու Յորքում Medicare-ի գործով ձերբակալված Դավիթ Միրզոյանն իրեն մեղավոր է ճանաչել ռեկետի, խարդախության, փողերի լվացման և անձնական տեղեկության առևանգման մեջ: Ինչպես հաղորդում է «Ամերիկայի ձայնը», այս հանցագործությունները նա իրագործել է ԱՄՆ-ում գործող ծերերին բժշկական օգնություն ցուցաբերելու համար նախատեսված Medicare համակարգից ավելի քան 100 մլն դոլար ներգրավելու ընթացքում:
Միրզոյանը ձերբակալվել էր մոտ 2 տարի առաջ Լոս Անջելեսում` հանցավոր խմբավորման մյուս անդամների հետ (խմբի միջուկը ազգությամբ հայեր են): Այդ ժամանակ, ընդհանուր առմամբ, ԱՄՆ Արևմտյան և Արևելյան ափամերձ շրջաններում ձերբակալվել էր ավելի քան 50 մարդ: Այդ առիթով Նյու Յորքի Արևելյան շրջանի դաշնային դատավոր Փիրթ Բհարարան հատուկ մամուլի ասուլիս էր անցկացրել՝ հայտարարելով, որ բացահայտվել է խոշորագույն խարդախությունների ցանց: Մեղադրյալները, օգտագործելով գողացված տվյալներ, 118 ֆիկտիվ բժշկական կլինիկաներ էին բացել ԱՄՆ 25 նահանգներում: Նրանք Medicare-ի վճարման էին ներկայացրել, ընդհանուր առմամբ, շուրջ 100 մլն դոլար բժշկական ծառայությունների հաշիվ, սակայն իրականում նման ծառայություններ ոչ մեկը չէր ստացել:
Բհարարայի խոսքերով՝ հանցագործները նախքան ձերբակալվելը խարդախությունների ճանապարհով ստացել են 35 մլն դոլար: Բհարարան բացահայտված հանցագործությունն անվանել էր «միջազգային»՝ ընդգծելով, որ նրա ղեկավարներն ամուր կապեր են ունեցել Հայաստանի հետ՝ պարբերաբար այցելելով այդ երկիր և ԱՄՆ-ում հանցավոր ճանապարհով ձեռք բերված գումարով այնտեղ անշարժ գույք գնել: Բհարարան խմբավորումը համեմատել է «դասական Cosa Nostra»-ի հետ՝ ավելացնելով, որ «անօրինական եկամուտների, աշխարհագրական ընդգրկվածության և նպատակասլացության տեսանկյունից ավանդական մաֆիան կարող էր նախանձել այդ հայ-ամերիկյան խմբավորմանը»:
Հետաքննության տվյալներով՝ Դավիթ Միրզոյանն անուղղակիորեն ղեկավարում էր Լոս Անջելեսում հանցավոր խմբավորման գործունեությունը, իսկ Նյու Յորքում այդ գործառույթն իրականացնում էր Ռոբերտ Թերջանյանը: «Միրզոյան-Թերջանյան կազմակերպությունը», ինչպես նրանց անվանում են մեղադրական եզրակացության մեջ, զբաղվել է խարդախություններով, ռեկետով, անձնական տվյալներ գողանալով, վարկային քարտեր կեղծելով, դրամաշորթությամբ, ծխախոտի և «վիագրայի» անօրինական տարածմամբ: Մեղադրական փաստաթղթերում ասվում է, որ հանցագործները մոլորության մեջ են գցել ԱՄՆ իմիգրացիոն իշխանություններին և «օտարերկրյա կառավարության ներկայացուցիչների օգնությամբ այնպես են արել, որ այդ կառավարությունը հրաժարվել է ընդունել ԱՄՆ-ից արտաքսվող անձանց՝ այդպիսով ԱՄՆ իշխանություններին զրկելով նրանց երկրից արտաքսելու հնարավորությունից»:
Մեկնաբանելով Միրզոյանի խոստովանությունը՝ դաշնային դատախազ Բհարարան նրան անվանել է «հանցավոր պարտիզան, որը ներխուժել է մեր երկրի առողջապահական համակարգ»: Դատախազն ավելացրել է, որ մեղքի խոստովանությունն անխուսափելի կդարձնի Միրզոյանի դատավճիռը: Միրզոյանին սպասվում է 75 տարվա ազատազրկում, սակայն սովորաբար մեղքը խոստովանելու դեպքում դատավորը մեղմացնում է դատավճիռը, հատկապես երբ մեղադրյալը համաձայնում է վկայություն տալ իր համախոհների դեմ: Արդյո՞ք Միրզոյանի հետ նման համաձայնություն է ձեռք բերվել՝ չի հաղորդվում: Նրա դատավճիռը կկայացվի 2013թ. փետրվարի 6-ին:
