Грузия Online-ի փոխանցմամբ՝ Վրաստանի վարչապետի թեկնածու Բիձինա Իվանիշվիլին խորհրդարանական փոքրամասնության հետ հանդիպման ժամանակ անդրադարձել է գործազրկության ու փախստականների խնդրին.
«Վրաստանի բնակչության բացարձակ մեծամասնությունն աշխատանքի տեղավորված կլինի 3-4 տարի անց: Ես զերծ եմ մնում ստույգ ժամկետ նշելուց: Հնարավոր է՝ ներդրումներն ավելի շուտ լինեն, եթե մենք կարողանանք ներդնողներին համոզել, որ երկրում տիրում է քաղաքական կայունություն: Հուսով եմ, որ 3-4 տարի անց կգրանցվի բեկում, և բնակչության բացարձակ մեծամասնությունը տեղավորված կլինի աշխատանքի:
Ես նաև չեմ կարող ստույգ ժամկետ նշել փախստականների նպաստի բարձրացման կապակցությամբ: Նորմալ պետությունը, այդ թվում նաև մենք, պետք է բարձրացնենք փախստականների նպաստները նվազագույն սպառողական զամբյուղի չափ: Մենք պետք է առավելագույնս հոգ տանենք մեր փախստականների մասին, որոնք վերջին տարիներին մեծ դժվարություններ են կրել:
Հասկանալի է, որ փախստականների նպաստը չպետք է պակաս լինի նվազագույն սպառողական զամբյուղից: Վրաստանում տնտեսությունն ու հասարակությունը պետք է ներդաշնակ զարգանան: Փախստականների հարցը մենք կընդգրկենք առաջնահերթությունների թվում, որպեսզի հնարավորինս արագ նրանց ապահովենք բնակատեղով»:
