«Առաջին լրատվական»-ի զրուցակիցն է «Ժառանգություն» խմբակցության նոր անդամ Թևան Պողոսյանը:
– Պարոն Պողոսյան, փաստորեն «Ժառանգության» ղեկավար Րաֆֆի Հովհաննիսյանը մանդատը Ձեր համար վայր դրեց, որ Դուք գաք Ազգային ժողով:
– Ո՛չ, նա մանդատը ինձ համար վայր չդրեց, նա հետևողական եղավ իր ծրագրին, խոստումներին: Նա սա իր քաղաքականության համար արեց, նրա վարած քաղաքականությունը արդյունքի իմաստով դրան է հանգել: Եթե նա ինձ համար մանդատը վայր դնելու խնդիր ունենար, կաներ առաջին օրը: Ինչն էր խնդիրը, որ այդքան երկար սպասեց: Ես էլ ավելի վաղ կգայի խորհրդարան, կպատրաստվեի:
– Կարծիք կա, որ Դուք «Ժառանգության» ցուցակում իշխանության մարդն եք:
– Ինձ շատ մարդու հետ կապեցին: Այսօրվա դրությամբ կարող են կապել նաև Լևոն Զուրաբյանի հետ, որովհետև նրա հետ ժամանակին աշխատել եմ: Ունեմ շատ փայլուն ընկերներ ՀԱԿ-ում, Դաշնակցությունում, «Ժառանգությունում»: Ցանկացած մարդու հետ կարող են ինձ կապել: Ես ստացել եմ հրավեր, ինձ համար նույնիսկ ցուցակում տեղն է զարմանալի եղել: Ինձ հրավիրել էին, բայց չէին ասել, որ նման տեղում եմ լինելու: Երբ «Ժառանգության» ցուցակը հրապարակեցին, ես զարմացա, որ այդ տեղում եմ:
– Հենց դրա համար էլ ասում են, որ Դուք իշխանության մարդն եք:
– Թող ասեն, ինչ կարող եմ ասել: Եթե մարդկանց թվում է, թե Լուսնին նայելով կարող են ինչ-որ բաներ կանխագուշակել, թող ասեն: (Այս խոսքի վրա ՀՀԿ խմբակցության անդամ, ՄԻԱԿ-ից Լևոն Մարտիրոսյանը մոտեցավ ու ասաց, թե իր կողմից նշենք, որ ուրախ է, որ Թ. Պողոսյանը պատգամավոր է դարձել.- Ա. Ա.): Արմեն Մարտիրոսյանն էր շատ դիպուկ բնորոշել, թե եթե իրեն ասեն` դու ուղտ ես, ինքը հո չի սկսելու ապացուցել, որ ուխտ չէ: Ես ինչ կարող եմ ասել իմ մասին շրջանառվող խոսակցությունների համար: Աշխատանքը ցույց կտա, թե ով ով է:
– Դուք Ձեզ ո՞ր դաշտի պատգամավոր եք համարում:
– Ընդդիմադիր: «Ժառանգությունը» ընդդիմադիր խմբակցություն է:
– Իսկ ի՞նչ կրծքանշան եք փակցրել Ձեր բաճկոնին:
– Իմ ղեկավարած կենտրոնի կրծքանշանն է: Երբ կտան ՀՀ պատգամավորի կրծքանշանը, դա կփակցնեմ:
– «Ժառանգություն» խմբակցության ներսում տիրող մթնոլորտը Ձեզ չի՞ ճնշում:
– Հասկանալի է, որ իրավիճակը մի փոքր լարված է, բայց ես միացել եմ այն լայն պլատֆորմին ու նախընտրական ծրագրին, որը «Ժառանգությունն» է առաջարկել: Ես կաշխատեմ այն պլատֆորմի շրջանակում, ինչին միացել եմ:
– Իսկ այդ խմբակցությունում Դուք ո՞ւմ հետ եք աշխատելու, «Ազատ դեմոկրատների՞», թե՞ «Ժառանգության»:
– Ես «ժառանգության» ծրագրին եմ միացել, նրանց հետ եմ աշխատելու: Ես նրանց նախընտրական դաշինքին համաձայն եղել եմ, բայց ցուցակում լինելու հրավերքը ստացել եմ «Ժառանգությունից» ու Ր. Հովհաննիսյանից: Հնարավոր է` ներսում ինչ-որ հարցերի հետ կապված խնդիրներ, վիճաբանություններ ունենանք, բայց ես լինելու եմ այդ խմբակցության անդամը և արտահայտելու եմ խմբակցության տեսակետը:
– Ընտրություններից հետո, երբ պարզ դարձավ, որ «Ժառանգությունը» ԱԺ-ում ընդամենը 5 մանդատ է ունենալու, իրենց նախկին պատգամավորներ Ստեփան Սաֆարյանին, Անահիտ Բախշյանին, Արմեն Մարտիրոսյանին խորհրդարան բերելու խնդիր առաջացավ… Այն ժամանակ խոսակցություններ կային, որ Ձեզ էլ է առաջարկվել մանդատը վայր դնել, բայց չեք համաձայնել:
– Ո՛չ, ինձ այդպիսի առաջարկություն չի եղել, ոչ էլ «Ժառանգությունում» նման նպատակ է եղել: Իմ պարագայում նման խնդիր չի եղել, դրանք ասեկոսեներ են: Ինձ միայն բարի մաղթանքներ են արել: Ցանկացած հարցի համար դիմում եմ կուսակցությանը, քննարկում ենք և կարող ենք միասին աշխատել: Մենք հիմա թիմով աշխատում ենք:
– Իսկ պատկերացնո՞ւմ եք, թե խորհրդարանում ինչ խնդիրների շուրջ եք գործունեություն ծավալելու:
– Բացի օրհասական հարցերից, պետք է փորձեմ ամեն ինչ անել, որ քաղաքացիական հասարակության և օրենսդիրի աշխատանքի մեջ համագործակցություն լինի: Որ քաղաքացիական հասարակության ինստիտուտները կայանան, դրա համար նաև նոր մեխանիզմներ ստեղծենք: Իմ մասնագիտական հնարավորությունները ներդնելու եմ նաև այլընտրանքային վերլուծական քաղաքականություն ձևավորելու համար:
– Դուք համեմատաբար չեզոք մարդ եք այդ խմբակցությունում: Ձեր կարծիքով` ճի՞շտ էր «Ժառանգության» և «Ազատ դեմոկրատների» նախընտրական միավորումը:
– Ես չէի պատկերացնում, որ նման խնդիրներ պետք է լինեին: Ի սկզբանե մենք Ուխտ էինք ստորագրել, նախընտրական ծրագիր է եղել: Լայն պլատֆորմ էր ստեղծվել, որը նոր միտք, նոր շունչ էր բերել Հայաստանի քաղաքական իրականության մեջ: Եվ եթե կատարեին նախապես ձեռք բերված պայմանավորվածությունները, պառակտում չէր լինի:
– Ի՞նչ պայմանավորվածությունների մասին է խոսքը:
– Այն պայմանավորվածությունների, որոնք այսօր խնդիր են առաջացրել այդ երկու կուսակցությունների մեջ: Ես չգիտեմ, թե ինչ պայմանավորվածություն է եղել, բայց մի բան գիտեմ, որ եթե պայմանավորվածություններ են լինում, պետք է անպայման հարգվի և պահպանվի:
– Ի՞նչ պայմանավորվածություն չի կատարել Ր.Հովհաննիսյանը:
– Ես չգիտեմ մի այնպիսի բան, որ Ր.Հովհաննիսյանը կատարած չլինի:
– Իսկ ի՞նչը չի կատարել Խաչատուր Քոքոբելյանը:
– Այդ հարցն իրեն ուղղեք: Ես չէի ցանկանա, որ պառակտում լիներ: Դրա համար կային խմբակցությունը պահելու մեխանիզմներ՝ պետք էր պայմանավորվածությունները պահպանել:
– Ըստ երևույթին ակնարկում եք Ր. Հովհաննիսյանի այն հայտարարությունը, թե Խ. Քոքոբելյանի հետ պայմանավորվել էին, որ երկուսով պետք է մանդատը վայր դնեն:
– Ես ընդամենը գիտեմ, որ ինչ-որ պայմանավորվածություն է եղել, որը չի կատարվել: Այդ հարցն իրենց ուղղեք: Ես չեմ ուզում շամանություն կամ և ինչ-որ ենթադրություններ անել:
