Ցանկացած շենք ենթակա է վաճառքի, եթե լավ գին տան: Օրինակ՝ եթե ՀՀ տրանսպորտի և կապի նախարարության շենքի վաճառքի վերաբերյալ լավ առաջարկ ներկայացվի, ապա այդ հայտը ենթակա կլինի քննարկման: Այսօր լրագրողների հետ հանդիպմանը նման հայտարարություն արեց Պետական գույքի կառավարման վարչության պետ Արման Սահակյանը:
Ըստ նրա՝ արտաքին գործերի նախարարության շենքի վաճառքի նախագիծը կառավարությունում քննարկվել է 1-2 ամիս, շենքի գնահատումն իրականացրել է Պետական գույքի կառավարման վարչության ՊՈԱԿ-ը՝ ելնելով հարակից տարածքների շինությունների արժեքներից: Սահակյանի խոսքով՝ այսօր քաղաքի այդ հատվածում շինության 1 քառակուսի մետրը տատանվում է 1500-2000 դոլարի սահմաններում, ԱԳՆ տարածքը 3600 քմ է, և գինը կրկնապատկվել է, այսինքն՝ ԱԳՆ շենքը վաճառվել է «շուկայականից բարձր գնով»: Օրինակ՝ «Մարիոթը» ժամանակին վաճառվել է 8 մլն դոլարով:
Թե ինչո՞ւ շենքի վաճառքի հարցը չի դրվել հանրային քննարկման, Ա. Սահակյանը հայտարարեց, որ պարտավոր չէ ցանկացած նման որոշման մասին հանրությանը տեղյակ պահել:
Վարչության պետը նշեց, որ այս գործարքը փոխկապակցված է մոտ 1 ամիս առաջ իրականացված մեկ այլ գործարքի՝ Վազգեն Սարգսյան փողոցի մի հատվածը «Տանգո» ընկերության սեփականատեր Էդուարդո Էռնեկյանին վաճառելու հետ, որի նախագծից կարելի էր հետևություն անել, թե ինչու է այդ տարածքը վաճառվում:
Սահակյանը հարկ համարեց հավաստիացնել, որ շենքի արտաքին տեսքը չի փոխվելու: Սեփականատերը, այսօր վճարելով 51 մլն 270 հազար դոլար, դեռ 3 տարի էլ պետք է սպասի, մինչև ԱԳՆ նոր շենքը պատրաստ լինի, հետո նույնքան գումար էլ ներդնի՝ շենքը հյուրանոցի վերածելու համար: Սահակյանը վստահեցրեց, որ Երևանը հյուրանոցների խիստ պակաս ունի, և որպես օրինակ` ասաց, որ վերջին շրջանում տեղի ունեցած մի քանի համաժողովների օրերին քաղաքի բոլոր հյուրանոցները լեփ-լեցուն էին:
«Առաջին լրատվական»-ի հարցին՝ եթե քննարկման ենթակա է ՏԿՆ շենքի վաճառքը, ապա նույն տրամաբանությամբ Հանրապետության հրապարակում հաջորդը Կառավարության շե՞նքն է, և արդյոք կա՞ առաջնահերթ վաճառքի ենթակա պետական շենքերի ցուցակ, Ա. Սահակյանը պատասխանեց, թե ինքը նշել է ընդամենը շենքի վաճառքի քննարկման ենթակա լինելու հանգամանքը, բայց ոչ՝ հենց վաճառքի, իսկ նման ցուցակ չկա:
Լուսանկարը՝ PanARMENIAN Photo-ի
