«Որպես տանտիկին` չե՞ք ասի՝ ի՞նչ է հնարավոր անել 35,000 դրամով, ինչպե՞ս է հնարավոր գոյատևել 1 ամիս»,- երեկ Aravot.am-ի այս հարցին ՀՀԿ պատգամավոր Կարինե Աճեմյանը պատասխանեց. «Իհարկե, դժվար է ապրել: Իհարկե, շատ կուզենայինք, որ ավելի բարձր լիներ»: Թերթի դիտարկմանը, որ դժվարն այն խոսքը չէ, դա նույնիսկ նվազագույն սպառողական զամբյուղից էլ պակաս գումար է, նա պատասխանեց. «Գիտեք, հաշվարկներ են արվել ֆինանսների նախարարությունում, կառավարությունում: Մենք չենք կարող այնքան մեծացնել բյուջեն, որ կարողանանք այդ բոլոր ծախսերն իրականացնել, ինչպես ուզում ենք: Այս դանդաղ, բայց հետևողական բարձրացումների արդյունքում երևի թե ինչ-որ ժամանակ հետո ավելի լավ կլինի»:
«Առավոտ»-ի հարցին` հնարավոր չէ՞ր այն շքեղություններն ուղղակի չանել, օրինակ` այն Toyota Camry-ները, որոնք բյուջեից Աժ-ն գնել է պատգամավորների համար, չէ` որ կարելի է այդպես քիչ-քիչ խնայողություններ անել, բայց տալ սպառողական զամբյուղին համապատասխան աշխատավարձ` տիկին Աճեմյանը պատասխանեց. «Այդպես կոնկրետանալ ինչ-որ մի… ես ինքս գիտեմ, որ Աժ-ն չի շռայլում ինչ-որ գումար: Եթե դուք գտնում եք, որ մեքենաները, որոնք պետք է տրամադրվեն Աժ-ին կամ կառավարության պաշտոնյաներին՝ չպիտի արվեն, դա այլ հարց է: Աժ-ում շատ տնտեսող քաղաքականություն է վարվում, և որևէ շքեղ մեքենա վերջերս ձեռք չի բերվել»:
Թերթը հետաքրքրվեց` ատկատներն է՞լ հնարավոր չէր կրճատել ու խնայողություն անել` տիկին Աճեմյանը պատասխանեց. «Այդ ուղղությամբ աշխատանքները շատ տեմպով առաջ են գնում»: Հարցին` նվազագույն աշխատավարձը 2500 դրամով բարձրացնելն այն առավելագո՞ւյնն էր, որ կարելի էր անել` ըստ Ձեզ, ՀՀԿ պատգամավորը պատասխանեց. «Բնական է, որ մենք էլ ենք շատ ցանկանում, որ ոչ թե 2500-ով բարձրանա, այլ կրկնապատկվի, եռապատկվի: Բայց այն, ինչ թույլ է տալիս այսօր մեր բյուջեն, այդ շրջանակներում ենք կարողանում բարձրացնել»:
