Այսօր ԱԺ նիստում «Նվազագույն ամսական աշխատավարձի մասին» ՀՀ օրենքում փոփոխություններ կատարելու մասին նախագծի քննարկման ժամանակ պատգամավոր Նիկոլ Փաշինյանը նկատեց, որ կառավարությունը իր բոլոր ծրագրերին մոտենում է «завтра, а может быть после завтра» սկզբունքով: Ըստ նրա՝ նվազագույն աշխատավարձի հաշվարկումն առանց սպառողական զամբյուղի հետ կապի մի փոքր անտրամաբանական է:
Ֆինանսների նախարար Վաչե Գաբրիելյանը նվազագույն աշխատավարձի և սպառողական զամբյուղի անհամաչափությունը պատճառաբանեց նրանով, որ բյուջեի հնարավորությունները սահմանափակ են:
Նախարարի խոսքով` պատգամավոր Հրանտ Բագրատյանի` նախկինում ներկայացրած և կառավարության կողմից մերժված նվազագույն աշխատավարձի մինչև 72 հազար դրամ բարձրացման մասին օրինագիծը հիմնավորված չէր` ինչու 72 հազար դրամ: 476 հազար աշխատողներից 310 հազարը ստանում են 75 հազարից ցածր: Ըստ նախարարի՝ եթե նվազագույն աշխատավարձն անմիջապես բարձրացվի, խնդիր է առաջանում կենսունակության տեսանկյունից, քանի որ մարզերում կան շատ բիզնեսներ, որ խնդիրներ են առաջանում և չեն կարող 72 հազար անմիջապես վճարել:
