ԵՄ երկրներն ամեն տարի կորցնում են իրենց համընդհանուր ՀՆԱ-ի 1.2 %-ը «կորսված սերնդի»՝ ոչ մի տեղ չաշխատող և չսովորող եվրոպացի երիտասարադության պատճառով: Eurofound գործակալությունը հետազոտության արդյունքում պարզել է, որ 14 մլն գործազուրկ երիտասարդ եվրոպացիները ԵՄ-ին արժենում են 153 մլրդ եվրո:
15-29 տարեկան երիտասարդ չաշխատող և չսովորող մարդկանց թիվը Եվրոպայի պատմության մեջ հասել է ռեկորդային մակարդակի: Ամեն շաբաթ ԵՄ տնտեսությանը նրանք արժենում են 3 մլրդ եվրո (պետական նպաստների ծախսերը և արտադրողականության նվազման հետ կապված կորուստները): Հաղորդվում է, որ միայն գործազուրկ երիտասարդների նպաստների համար ԵՄ երկրները ծախսում են տարեկան 10.8 մլրդ եվրո:
2008 թվից բնակչության այդ խմբի պահպանման վրա ծախսված գումարն աճել է 28 տոկոսով: Առավել մեծ ծանրաբեռնվածություն է կրում Իտալիան, որի տնտեսությունը երիտասարդության պոտենցիալը չօգտագործելու արդյունքում կորցնում է տարեկան 32.6 մլրդ եվրո: Ֆրանսիային այդ սոցիալական խնդիրն արժենում է տարեկան 22 մլրդ, Մեծ Բրիտանիային՝ 18 մլրդ:
Աշխատանք ունեցող երիտասարդ եվրոպացիների թիվը վերջին տարիներին հասել է ռեկորդային ցածր մակարդակի, անգամ նրանց կեսն աշխատում է ոչ լրիվ զբաղվածությամբ, ժամանակավոր և պատահական աշխատավայրերում:
Երիտասարդ գործազուրկները ցուցաբերում են համակարգից հիասթափության և քաղաքականությանը մասնակցության շատ ավելի բարձր մակարդակ, քան նրանց աշխատանք ունեցող և սովորող հասակակիցները: Նրանցից շատերը ընդհանրապես աշխատանքային փորձ չունեն. 25-29 տարեկան գործազուրկների 28%-ը երբեք ոչ մի տեղ չի աշխատել:
Հիշեցնենք. ավելի վաղ հաղորդվում էր, որ ԵՄ 27 երկրներում օգոստոսին հաշվում էր 25.466 մլն գործազուրկ, նրանցից 18.196 մլն-ը՝ եվրոգոտում: Հուլիսի համեմատությամբ՝ ԵՄ-ում գործազուրկների թիվն ավելացել է 49 հազարով, իսկ եվրոգոտում՝ 34 հազարով:
