1865թ. այս օրը ծնվեց դերասան, ՀԽՍՀ ժողովրդական արտիստ (1932թ.) Հովհաննես Աբելյանը:
Հովհաննես Աբելյանը ծնվել է Շամախի գյուղաքաղաքում, սովորել ծննդավայրի ծխական դպրոցում։ 1872թ. երկրաշարժից հետո ընտանիքով տեղափոխվել է Բաքու, ավարտել է «Մարդասիրական ընկերության» ռուսական դպրոցը և ռեալական ուսումնարանը։ Մասնակցել է ռեժիսոր և դերասան Ստեփան Սաֆրազյանի խմբի հյուրախաղերինՍտեփան։ 1882թ. եղել է Անդրեյ Գոնչարովի ռուսական խմբի դերասան, իսկ 1886թ. ընդունվել է Թիֆլիսի Հայոց դրամատիկական ակումբի թատերախումբ, դիմախաղի և ձայնի առոգանության դասեր առել Պետրոս Ադամյանից։
1887–1891թթ. խաղացել է Բաքվի հայկական և ռուսական թատերախմբերի ներկայացումներում, 1891թ.՝ Բաքվի և Թիֆլիսի հայկական թատրոններում։ 1895թ. Թիֆլիսում հիմնել է թատերախումբ, 1908թ. Արմեն Արմենյանի հետ կազմակերպել է Աբելյան-Արմենյան թատերախումբը, որի հետ 1913թ. ելույթներ է ունեցել Իրանում ու Միջին Ասիայում։ 1917թ. ընտրվել է Թիֆլիսի Հայ դրամատիկ դերասանների միության նախագահ։ 1920թ. մեկնել է արտասահման, հայկական խմբերի հետ խաղացել է Կոստանդնուպոլիսում, Կահիրեում, Եվրոպայի և ԱՄՆ-ի մի շարք քաղաքներում։
1925թ. հրավիրվել է Երևանի Առաջին պետթատրոն (այժմ` Գաբրիել Սունդուկյանի անվան ազգային-ակադեմիական թատրոն), սակայն1926թ. վերսկսել է շրջագայությունները Կովկասում, Ռուսաստանում և Միջին Ասիայում, 1927–1928թթ. աշխատել է Բաքվի հայկական թատրոնում։ Խաղացել է շուրջ 300 դեր։ Աբելյանը եղել է Ալեքսանդր Շիրվանզադեի կերտած կերպարների` Էլիզբարյանի («Պատվի համար»),Ռուստամի, Բարխուդարի («Նամուս»), Գիժ Դանիելի («Չար ոգի») չգերազանցված մարմնավորողը։ Նկարահանվել է «Նամուս» (1925թ.) ֆիլմում՝Բարխուդարի դերում։
Աբելյանի անունով է կոչվել Վանաձորի դրամատիկական թատրոնը (1936թ.) և փողոց՝ Երևանում։ Հովհաննես Աբելյանը Ալեքսանդր Աբելյանի եղբայրն էր։ Մահացել է 1936թ. օգոստոսի 1-ին Երևանում:
