Հեռուստատեսությունների հաճախականությունների սահամանափակումը աբսուրդ է: Այսօր Ազգային ժողովի նիստում հայտարարարեց պատգամավոր Ռուբեն Հակոբյանը՝ ներկայացնելով գիտության, կրթության, մշակույթի, երիտասարդության և սպորտի հարցերի մշտական հանձնաժողովի տեսակետը Հանրային հեռուստաընկերության 2011 թ. հաշվետվության առնչությամբ:
Ըստ նրա՝ ՀԸ-ները չեն իրականացնում իրենց պարտավորությունները, որի դեպքում պետք է զրկվեին արտոնագրերից, և օրենքի գործելու դեպքում ՀԸ-ների կեսը կարող էին զրկվել արտոնագրից: Ռ. Հակոբյանը նշեց, որ մրցութային փուլում մանրազնին դիտարկվում են ՀԸ-ների ծրագրերը, որոնք շատ լավն են լինում, մրցույթն անցնում է՝ այդ ծրագրերը մի կողմ են դրվում, ու «մեզ սերիալախեղդ» են անում: «ՀՀԸ-ն պետք է նշաձող սահմանի, որին ձգտեն հասնել նաև մյուսները»,- ասաց Ռ. Հակոբյանը:
Նա նշեց, որ հանձնաժողովը դրական է գնահատել ՀՀԸ-ի կողմից խորհրդարանական ընտրությունների լուսաբանումը, որն ավելի անկողմնակալ էր, քան մյուս ՀԸ-ներինը: Ռ. Հակոբյանը հայտնեց, որ հանձնաժողովն ի գիտություն է ընդունել հաղորդումը:
ՀՀԿ-ական պատգամավորները՝ ՀՀԿ խմբակցության ղեկավար Գալուստ Սահակյանի գլխավորությամբ, «կանոնակարգի խիստ խախտում» որակեցին Ռ. Հակոբյանի զեկույցը, որում հանձնաժողովի գնահատականը ներկայացվեց սեփական տեսակետներով համեմված:
