Chanel նորաձևության տան դիզայներ ձևավորող Կարլ Լագերֆելդը հերքել է ԶԼՄ-ներում հրապարակված այն տեղեկությունը, թե ինքը Ֆրանսիայի նախագահ Ֆրանսուա Օլանդին «հիմար» է անվանել հարուստներից լրացուցիչ հարկ գանձելու համար: Այս մասին հաղորդում է Agence France-Presse-ը:
«Ես հաստատ նման բան չեմ ասել»,- պարզաբանել է Լագերֆելդը՝ նշելով, որ, հետևաբար, ներողություն խնդրելու կարիք չկա: Ուրբաթ Լագերֆելդից անհապաղ ներողություն էր պահանջել Օլանդի նախկին կինը՝ Սեգոլեն Ռուայալը:
Լագերֆելդը նշել է, որ ԶԼՄ-ների այն տեղեկությունները, թե ինքը վիրավորել է Օլանդին, անհիմն են, քանի որ ինքը Ֆրանսիայի նախագահին «միանգամայն խելամիտ» մարդ է համարում:
Դիզայները ենթադրել է, որ բարձրացված աղմուկը պայմանավորված է իր խոսքերի վատ իսպաներեն թարգմանությամբ, քանի որ ինքը իսպաներեն չգիտի:
Լագերֆելդը պատմել է, որ իսպանական Marie Claire պարբերականին տված իր երեքժամյա հարցազրույցում ինքը քննարկել է լյուքս ապրանքների ինդուստրիայի նկատմամբ բացասական վերաբերմունքը, և մասնավորապես ֆրանսիական մամուլի «սարսափելի» հայտարարությունները ֆրանսիայի ամենահարուստ գործարար, Moet Hennessy Louis Vuitton (LVMH) կոնցեռնի ղեկավար Բեռնար Առնոյի հասցեին:
Ընթացիկ տարվա սեպտեմբերին Առնոն դիմել էր Բելգիայի քաղաքացիություն ստանալու համար, իսկ մամուլում այդ որոշումը կապել էին այն բանի հետ, որ նա փորձում է խուսափել հարուստների դեմ սահմանվելիք հավելյալ հարկից:
