Ադրբեջանական Trend լրատվական գործակալության փոխանցմամբ՝ Թուրքիայի Ջեյհան նավահանգստում նավթով բեռնավորվել է 2000-րդ լցանավը: Այս մասին նշված է թուրքական BOTAŞ ընկերության պաշտոնական կայքում:
BOTAŞ-ը 2001 թվականից սկսած՝ զբաղվել է Թուրքիայի տարածքում «Բաքու-Թբիլիսի-Ջեյհան» (ԲԹՋ) նավթամուղի կառուցմամբ ու շահագործմամբ: 2006 թվականի հունիսի երկրորդ կեսից մինչև 2012 թվականի հոկտեմբերի երկրորդ կեսը Ջեյհանի նավթային տերմինալում բեռնվել է ԲԹՋ-ով բերված 1,544,000,000 բարել նավթ:
ԲԹՋ-ի երկարությունը կազմում է 1768 կիլոմետր, որոնցից 443-ը բաժին է ընկնում Ադրբեջանի տարածքին, 249 կիլոմետրը՝ Վրաստանին և 1076 կիլոմետրը՝ Թուրքիային:
Հիշեցնենք, որ Թուրքիայի իշխանությունները բազմաթիվ միջոցառումներ են պլանավորում ու իրականացնում՝ կապված Ջեյհան նավահանգստի հետ՝ նպատակ հետապնդելով այն վերածել «թուրքական Ռոտերդամի»։ Ռոտերդամի նավահանգստի բեռնաշրջանառությունն ամենամեծն է Եվրոպայում, իսկ 1962-2004 թվականներին՝ նաև ամբողջ աշխարհում (այժմ առաջատարը Շանհայի նավահանգիստն է):
