Սերբիայի վարչապետ Իվիցա Դաչիչը Բրյուսելում եվրոպական դիվանագիտության ղեկավար Քեթրին Էշթոնի և Կոսովոյի վարչապետ Հաշիմ Տաչիի հետ հանդիպումից հետո հայտարարել է, որ պատմական ձեռքսեղմում չի եղել և որ Բելգրադը չի փոխի Կոսովոյի կարգավիճակի հարցում իր դիրքորոշումը:
Դաչիչը հայտնել է, որ Բելգրադի և Պրիշտինայի միջև բանակցությունները կվերսկսվեն նոյեմբերին, և մինչ այդ Սերբիայի կառավարությունը կպատրաստի իր հենահարթակը:
«Երկխոսությանը մասնակցելու համաձայնություն տալով՝ Սերբիան չի փոխում իր դիրքորոշումը Կոսովոյի կարգավիճակի հարցում»,- նշել է Դաչիչը` ավելացնելով, որ Բելգրադը չի ցանկանում, որ բանակցությունների արդյունքը լինի Կոսովոյի անկախության ճանաչումը, որը միակողմանի հռչակվել է 2008-ի փետրվարի 17-ին:
Բելգրադի իշխանությունները շարունակում են Կոսվոն համարել Սերբիայի տարածքի մի մասը:
Այսօր Քեթրին Էշթոնն առանձին հանդիպել է Դաչիչի և Տաչիի հետ, հետո կազմակերպել է համատեղ նիստ, որը դարձել է առաջին հանդիպումն այդ ձևաչափով:
Վերջին ամիսներին կողմերը բազմիցս երկխոսությունն ավելի բարձր մակարդակով անցկացնելու պատրաստակամություն են հայտնել: