Լիբիայի ապստամբ ուժերը հայտարարել են, որ իրենք զենքի խնդիր չունեն, իսկ եթե անհրաժեշտություն առաջանա, ապա Քաթարը և մի շարք երկրներ պատրաստ են իրենց ապահովել այդ զենքով: Այս մասին հաղորդում է Reuters գործակալությունը` հղում կատարելով Լիբիայի ազգային խորհրդին, որը ձևավորվել է ընդդիմության կողմից:
Այդ խորհրդի մամուլի ծառայության աշխատակից Մուստաֆա Գերիանին ասել է, որ թռիչքների արգելման դեպքում (Արևմուտքը ցանկանում է արգելել բոլոր թռիչքները Լիբիայի տարածքում, որպեսզի Մուամար Քադաֆիի կողմնակիցները չկարողանան օդուժ կիրառել ընդդիմադիրների դեմ.–1in.am) իրենք այլևս չեն վախենա կառավարական օդուժի կողմից ռմբակոծվելուց, և միակ խնդիրը կմնա զրահամեքենաների դեմ պայքարը. «Մենք կտեսնենք, արդյո՞ք անհրաժեշտ է զենք գնել: Ես դրանում խնդիր չեմ տեսնում: Քաթարը և շատ այլ երկրներ մեզ առաջարկել են իրենց օգնությունը»,- ասել է Գերիանին:
Տեղեկացնենք նաև, որ երեկ ողջ օրվա ընթացքում և այս գիշեր ապստամբների և Քադաֆիի կողմնակիցների միջև շարունակվել են կատաղի մարտերը: Euronews-ի փոխանցմամբ` Ալ-Զաուիյա քաղաքը հետզհետե վերածվում է աղետի գոտու, քանի որ քաղաքի կենտրոնը գրեթե ամբողջությամբ ավերվել է, քանդվել են շենքեր, իսկ մարդիկ ամեն գնով ցանկանում են լքել այն: Հակասական են տեղեկությունները, թե ովքեր են վերահսկում քաղաքը: Երեկ տեղեկություն էր տարածվել, որ լիբիական օդուժը ռմբակոծում է երկրի նավթարդյունաբերական համալիրները:
