Ապացուցողական բժշկությունը, որպես բժշկական կրթության, բժշկագիտական և կլինիկական ժամանակակից մեթոդ, ներառված է աշխարհի ավելի քան 50 երկրի առողջապահական համակարգերում:
Հոկտեմբերի 18-ից ՀՀ առողջապահության նախարարության Առողջապահության ազգային ինստիտուտում ընթանում է միջազգային եռօրյա գիտաժողով` «Ապացուցողական բժշկությունը Հայաստանում, հորինվա՞ծք, թե իրականություն» թեմայով:
Գիտաժողովին մասնակցել են ապացուցողական բժշկության ջատագովներ, ճանաչված բժիշկ-գիտնականներ Մեծ Բրիտանիայից, Գերմանիայից, Նիդեռլանդների թագավորությունից, Ռուսաստանի Դաշնությունից, Ուկրաինայից, Եվրոպական այլ երկրներից, ովքեր 10 տարուց ավելի ապացուցողական բժշկության ասպարեզում հսկայական ներդրում են ունեցել:
Հայաստանի Հանրապետությունում ապացուցողական բժշկության առաջին ջատագովը բ.գ.դ. պրոֆեսոր Ռուբեն Հովհաննիսյանն է, ում ջանքերով էլ կազմակերպվել է միջազգային այս գիտաժողովը:
ՀՀ առողջապահության նախարարին կից գիտխորհրդի նախագահ, պրոֆեսոր Բորիս Խուդավերդյանը, ՀՀ ԳԱԱ և ԲԳԱ-ի ակադեմիկոս-քարտուղար պրոֆեսոր Վիլեն Հակոբյանը, մյուս բանախոսներն ընդգծել է, որ ապացուցողական բժշկությունը փշոտ ճանապարհ է անցել ոչ միայն զարգացող, այլև զարգացած երկրներում:
Անցած 10-12 տարիների ընթացքում այս ուղղությամբ Հայաստանում տարված աշխատանքների շնորհիվ մեզանում ևս ապացուցողական բժշկությունը կարևորվում է։ Արդեն իսկ կյանքի են կոչվել կարևորագույն դիսցիպլինաներ։ Բանախոսների կարծիքով հեռու չէ այն ժամանակը, երբ ապացուցողական բժշկությունը մեզանում ևս քաղաքացիական իրավունք կնվաճի:
Միջազգային գիտաժողովում ապացուցողական բժշկության դիսցիպլինաների շուրջ զեկույցներով հանդես եկան Ռուբեն Հովաննիսյանը («Ապացուցումների վրա հիմնված բժշկությունը Հայաստանում երեկ այսօր և վաղը»), ՌԴ ապացուցողական բժշկության մասնագետների միության նախագահ, պրոֆեսոր Վասիլի Վլասովը («Դեղորայքային ծրագրերի բարոյագիտական և մեթոդաբանական հիմքերը»), Օթմար Մյուլերը («Yp To Date» տվյալների շտեմարանը որպես կլինիկական որոշակի իրավիճակում ապացույցների վրա հիմնված բժշկության գործիք») և ուրիշներ:
Միջազգային գիտաժողովի ամփոփիչ օրը` հոկտեմբերի 20-ին, Առողջապահության ազգային ինստիտուտում կկայանա կլոր սեղան «Ապացուցողական բժշկությունը որպես առողջապահության տեխնոլոգիաների գնահատման հիմք` կատարյալ մոդելից դեպի իրական կլինիկական գործունեություն» թեմայով:
