Լիբիայի կառավարությանը հավատարիմ զինված ջոկատները շրջապատել են Տրիպոլիից հարավ-արևելք գտնվող Բանի Վալիդ քաղաքը, հաղորդում է BBC-ն: Վերջին տվյալներով՝ քաղաքը հրետակոծության է ենթարկվել, ինչի հետևանքով կան զոհեր և վիրավորներ:
Կառավարական զորքերի կողմից մարտերին մասնակցում են հիմնականում Միսրատայի և նրա շրջակայքի ջոկատները: Նրանց և Բանի Վալիդի բնակչների միջև թշնամությունը շարունակվում է դեռ նախորդ դարի սկզբից:
Այս անգամ բախման առիթ է ծառայել Միսրատայի բնակիչների պահանջը՝ հանձնել Քադաֆիին սպանած 22-ամյա Օմրան բեն Շաաբանին առևանգողին և նրա վրա կրակողին: Հուլիսին Շաաբանի վրա կրակել էին և նրան առևանգել:
Առևանգումից 50 օր անց Լիբիայի կառավարությանը հաջողվեց վերադարձնել Շաաբանին, սակայն նա մահացավ ստացած վերքերից:
Բանի Վալիդը վարֆալլա ցեղի կենտրոններից մեկն է, որը Մուամար Քադաֆիի կառավարման օրոք մեծ արտոնություններ ուներ: Նրա ներկայացուցիչները կարևոր պաշտոններ էին զբաղեցնում պետությունում, և զգալի բիզնես ակտիվներ ունեին:
Քադաֆիի սպանությունից հետո Բանի Վալիդի բնակիչները շարունակում են հավատարիմ մնալ նրան:
