«Վարդան Օսկանյանն իր քաղաքական գաղափարախոսական կարողություններով չի կարող լինել գահի հավակնորդ»,- այսօր լրագրողների հետ հանդիպմանը ասաց Մարքսիստական կուսակցության ղեկավար Դավիթ Հակոբյանը՝ անդրադառնալով այն խոսակցություններին, թե Օսկանյանը գալիք նախագահական ընտրություններում կառաջադրի իր թեկնածությունը:
Ըստ բանախոսի՝ հափշտակել գահը օտարերկրյա հովանավորչության միջոցով չի նշանակում լինել նախագահ: Դավիթ Հակոբյանի կարծիքով՝ նա իր դիվանագիտության «վայ Վարդանը» պետք է կանչի, նոր անցնի տնտեսագիտական քաղաքականության, որով պետք է զբաղվի երկրի նախագահը:
«ԱՄՆ-ը պարտադիր կերպով ուզում է սրընթաց կերպով դեպի գահ տանել Օսկանյան Վարդանին, սակայն ես կարծում եմ` գահի համար նա պիտանի չէ: Ամերիկացիներին հուշում եմ, որ պետական հեղաշրջում իրականացնելու համար Օսկանյանը հարմար ֆիգուր չէ»,- նկատեց բանախոսը:
Մարքսիստական կուսակցության ղեկավարը հայտարարեց, որ գալիք նախագահական ընտրություններին չի սատարելու ոչ մեկին, իր ամբողջ ուժերը ներդնելու է իր թեկնածության համար, այսինքն՝ անպայման մասնակցելու է նախագահական ընտրություններին:
Նա նշեց, որ այսօրվանից մենք մտած ենք նախագահական ընտրությունների մարաթոն: «Յուրայինների նկատմամբ հաղթանակ չեն տանում, նրանց նկատմամբ հաղթանակ չեն տոնում, նրանց նկատմամբ առավելության են հասնում, իսկ ընտրություններին հաղթողը նա է, ով կարող է լինել նոր տնտեսական քաղաքականության ճարտարապետը: Առայժմ այս ոլորտում տորիչելյան դատարկություն է, իսկ այդ առումով իմ առաքելությունն անհրաժեշտություն է»,- նման կարծիք հայտնեց հանրապետության գլխավոր մարքսիստը:
Նա նախագահին խորհուրդ տվեց. «ԱԺ-ն ղեկավարելու համար խնդրել Լևոն Տեր-Պետրոսյանին, իսկ Գագիկ Ծառուկյանին չփչացնել: Այդ մարդուն տվեք տեխնոկրատներին արժանի պաշտոն՝ վարչապետի պաշտոնը, և գնացեք նախագահական ընտրությունների: Եթե Հանրապետականը շարունակի երկու ձեռքով իշխանության երեք գլուխներն էլ գրկել, ապա Օսկանյան Վարդանը կգնա դեպի գահ»:
Լուսանկարները՝ PanARMENIAN Photo-ի
