ԱՄՆ առաջին տիկին Միշել Օբամայի ավտոշարասյունը վթարի է ենթարկվել: Այս մասին հայտնում է НТВ-ն: Միջադեպը տեղի է ունեցել Օհայո նահանգի Դելավեր քաղաքում:
Ինչպես տեղեկացնում է Reuters գործակալությունը` հղում անելով տեղի ոստիկանության ներկայացուցիչներին, ավտոշարասյան երկու մոտոցիկլետավարներ միմյանց են բախվել: Նրանք երկուսն էլ տուժել են և հոսպիտալացվել: Վնասվածքներն աննշան են, նրանց շուտով դուրս կգրեն հիվանդանոցից:
Բարաք Օբամայի նախընտրական շտաբի ներկայացուցչի խոսքով` նախագահի կինը ելույթով հանդես է եկել Օհայոյի Ուեսլիան համալսարանում: Դեպքը տեղի է ունեցել, երբ առաջին տիկինը ուղևորվում էր օդանավակայան:
Միշել Օբաման միջադեպի հետևանքով չի տուժել, ավտոշարասյունը կանգ չի առել:
Նման նորությունները դժվար թե ավելացնեն Բարաք Օբամայի վարկանիշը, որը ցանկանում է նախագահի պաշտոնում ընտրվել երկրորդ ժամկետում: Հաջող բանավեճերից հետո Ռոմնիի վարկանիշը անշեղորեն աճում է: Այսօր տեղի կունենա դեբատների հերթական փուլը:
