Այսօր Շենգավիթ վարչական շրջանի ընդհանուր իրավասության դատարանում պետք է կայանար Վադիմ Ջաղեթյանի գործի դատավարությունը: 2012 թվականի մայիսի 9-ին, ժամը 6-ն անց 30-ին Ջաղեթյանը զանգահարել էր ոստիկանության Երևան քաղաքի վարչության հերթապահ մաս և, ներկայանալով որպես ազգային անվտանգության ծառայության գնդապետ Կառլեն Անտոնյան, հայտնել էր, որ ոստիկանության Շենգավիթի քննչական բաժնում, երրորդ հարկի պատուհանագոգի ծաղկամանի մեջ էլեկտրական ռումբ է տեղադրված:
Ջաղեթյանին շուտով բացահայտել էին ու մեղադրանք առաջադրել նախապատրաստվող ահաբեկչության մասին սուտ հաղորդում տալու համար՝ ՀՀ քրեական օրենսգրքի 259 հոդվածով:
Գործով նշանակված դատաբժշկական փորձաքննության եզրակացության համաձայն՝ Ջաղեթյանը հոգեկան հիվանդության պատճառով ճանաչվել է անմեղսունակ: Դատարանը պետք է որոշի բժշկական հարկադրանքի միջոցը, որը պետք է կիրառվի Ջաղեթյանի նկատմամբ: Սակայն դատական նիստն այսօր չկայացավ ամբաստանյալ Ջաղեթյանի բացակայության պատճառով:
Դատարանը տեղեկացվել էր, որ կալանավորներին դատարան ուղեկցող անձնակազմի թվաքանակի ոչ բավարար լինելու պատճառով հնարավոր չի եղել ապահովել Ջաղեթյանի ներկայությունը դատական նիստին:
Ստացվում է, որ կալանքի տակ գտնվող ամբաստանյալներն այնքան շատ են, որ նրանց դատարաններ հասցնելու համար ուղեկցող անձնակազմերն արդեն չեն բավարարում: Հետևաբար, կամ կալանքից բացի՝ խափանման այլ միջոցներ ևս պետք է կիրառվեն՝ պակասեցնելով կալանավայրերում իրենց դատին սպասող ամբաստանյալների թիվը, կամ պետք է ավելացվի ուղեկցողների թիվը՝ նոր աշխատատեղեր ստեղծելով, վերոհիշյալ պատճառաբանությամբ դատական նիստերը հնարավորինս չձախողելով ու առանց այն էլ ձգձգվող դատավարություններն ավելի չձգձգելով:
Ջաղեթյանի գործի քննությունը հետաձգվեց ու նշանակվեց հոկտեմբերի 23-ին: