Հաջորդ տարվա համար կառավարությունը խոստանում է՝ «ՀՀ ագրարային հատվածում կառավարության կողմից վարվող քաղաքականությունը 2013թ. կնպատակաուղղվի գյուղատնտեսության և նրան սպասարկող կառույցների, գյուղմթերքների իրացման ու վերամշակման ոլորտների գործունեության արդյունավետության բարձրացմանը, և դրա հիման վրա պայմաններ կստեղծվեն ագրոպարենային ոլորտի կայունացման, հետագա զարգացման ու ընդլայնված վերարտադրության կազմակերպման, աշխատանքի արտադրողականության բարձրացման, գյուղացիական տնտեսությունների իրական եկամուտների ավելացման, գյուղատնտեսությունում տնտեսվարողների համար բարենպաստ պայմանների ստեղծման, հիմնական պարենամթերքների ինքնաբավության և պարենային անվտանգության մակարդակի բարձրացման համար»:
Սակայն միաժամանակ 2013թ. բյուջեով գյուղոլորտին կուղղվի մոտ 3.3 մլրդ դրամ պակաս, քան այս տարի է նախատեսված: Այսպես, հաջորդ տարվա բյուջեի նախագծում «Գյուղատնտեսություն, անտառային տնտեսություն, ձկնորսություն և որսորդություն» տողով նախատեսվում է հատկացնել 21 մլրդ 936 մլն դրամ, որից գյուղատնտեսությանը կուղղվի մոտ 10 մլրդ 60 մլն դրամ, անտառային տնտեսությանը՝ 771 մլն, ոռոգմանը՝ 11 մլրդ 104 մլն դրամ, այն դեպքում երբ այս տարվա բյուջեով նախատեսված է ընդհանուր մոտ 25 մլրդ 200 մլն դրամ, որից գյուղատնտեսությանը՝ 11 մլրդ 486 մլն դրամ, անտառային տնտեսությանը՝ 763 մլն դրամ, ոռոգմանը՝ 12 մլրդ 952 մլն դրամ:
Ստացվում է, որ կառավարությունը «ոսկե սարեր» է խոստանում գյուղացուն, իսկ դրան հասնելու համար հատկացվող միջոցները կրճատում է:
