Մի քանի տասնամյակի երկարատև ընդմիջումից հետո ԱՄՆ-ը վերականգնում է նավթի արտահանումը: Այս մասին հաղորդում է The Financial Times-ը: Ըստ այդ տեղեկության՝ այնպիսի խոշոր համաշխարհային էներգետիկ կորպորացիաներ, ինչպիսիք են BP-ն, Royal Dutch Shell-ը, Vitol-ը, հայց են ներկայացրել ԱՄՆ կառավարություն՝ երկրի տարածքից նավթ արտահանելու արտոնագիր ստանալու համար: «Խոսքը խոշոր խմբաքանակների մասին է»,- գրում է պարբերականը:
«Այժմ ԱՄՆ-ում նավթի արդյունահանման ծավալները հասել են 1995 թվից հետո գագաթնակետային ցուցանիշի,- գրում է թերթը:- Արտադրության ավելացումը պայմանավորված է առաջին հերթին նորագույն տեխնոլոգիաներով, որոնք թույլ են տալիս նավթ արդյունահանել այն նավթահանքերից, որոնք նախկնում համարվում էին ոչ շահավետ»: Ընդ որում, պարբերականը կարծում է, որ «Միացյալ Նահանգներից նավթի արտահանման հոսքը կհանգեցնի նրա գնի նվազմանը աշխարհի այլ տարածաշրջաններում»:
ԱՄՆ-ի կողմից նավթի արտահանման վերսկսումն արտացոլում է խոշորագույն համաշխարհային էներգետիկ շուկաներում ստեղծվող նոր իրավիճակը: Այսպես, 1949 թվից հետո 2011 թ.առաջին անգամ ԱՄՆ-ի նավթային արտադրանքը արտահանման ծավալներով գերազանցեց ներմուծմանը:
