Կենտրոնական Ասիայում իրավիճակը կարող է ապակայունանալ Աֆղանստանից կոալիցիայի զորքերի դուրսբերումից հետո: Նման կարծիք է արտահայտել Heritage հիմնադրամի Ռուսաստանի, Եվրասիայի և միջազգային էներգետիկայի քաղաքականության հարցերով ծրագրի ղեկավար Արիել Քոհենը:
«Դրանք (ահաբեկչությունները Կենտրոնական Ասիայում և Ռուսաստանում.- 1in.am) ավելի ու ավելի կհաճախակիանան Աֆղանստանից կոալիցիայի դուրս գալուց հետո»,- ասել է Քոհենը՝ Աստանայում ելույթ ունենալով 10-րդ Եվրասիական մեդիաֆորումում:
Ինչպես հաղորդում է RIA Novosti-ն, նա իր կարծիքը հիմնավորել է նրանով, որ Աֆղանստանի ներկայիս կառավարությունը չի կարող պայքարել «Թալիբան» շարժման հետ: «Այս դեպքում այն կարող է տարածվել դեպի Կենտրոնական Ասիա, և ցավոք կապակայունացնի իրավիճակն այդ տարածաշրջանի նախկին խորհրդային հանրապետություններում»,- ասել է փորձագետը:
Քոհենը տարածաշրջանում ահաբեկչական և ծայրահեղական ազդեցությունների հնարավոր տարածումը համարում է «համակարգային սպառնալիք»՝ ընդգծելով, որ «ԱՄՆ կառավարությունը, պաշտպանելով Սիրիայում որոշակի ուժերի, հսկայական սխալ է գործում՝ ներդրում կատարելով այն միջավայրում, որը նպաստում է ամենակոշտ ծայրահեղականության զարգացմանը»:
Հիշեցնենք. Աֆղանստանից կոալիցիայի զորքերի դուրսբերումը նախատեսվում է 2014 թ.:
