Առողջապահության ոլորտում վերջերս բարձրաձայնվող խնդիրները նոր չեն, պարզապես նոր նախարար է եկել և փորձում է հասկանալ, թե ինչ կա-չկա ոլորտում։ Հանրային հեռուստաընկերության «Հարցազրույց» հաղորդման եթերում այս մասին նշել է առողջապահության նախարար Դերենիկ Դումանյանը:
Խնդիրներից առաջինը, որը հետաքրքրում է հանրությանը, ըստ նախարարի՝ դեղերի ոլորտն է, և հատկապես՝ դեղի արժեքը: Հանրությանը հետաքրքրում է, թե ինչու է դեղի գինը շուկայում անկանոն:
«Մենք ուսումնասիրեցինք շուկան և տեսանք, որ արտադրողների կողմից դեղերի գների էական բարձրացում չի եղել, և հետաքրքիր է, թե ինչու է Հայաստանում թանկանում: Վերջին 1-2 տարիներին կառավարությունը որոշումներ է կայացրել, որպեսզի ներկրումը դյուրին լինի, և դեղերը էժանանան, սակայն ոչ միայն չեն էժանացել, այլև թանկացել են»,- ասել է նախարարը՝ որպես պատճառ նշելով «օրենսդրական բացերը»: Մասնավորապես, ըստ նրա, դեղերի մասին օրենքն ընդունվել է 98 թվականին և արդեն բավականին հնացած է: Կառավարությունը պատրաստում է նախագիծ՝ օրենքի անկատարությունը շտկելու համար:
Դեղերի գնագոյացման հարցում, նախարարի խոսքերով, իր ղեկավարած գերատեսչությունը դեր չունի։ Այս հարցը, ըստ նրա, կկարգավորվի օրենքով, և իրենք կունենան զսպիչ դեր:
Պետությունը սոցիալապես անապահով և հատուկ խմբի անձանց անվճար դեղորայք է տրամադրում: Ոլորտի գլխավոր պատասխանատուն ընդունում է, որ բոլոր անվճար դեղերը չեն բավարարում: Բացի այդ, ըստ նրա, հսկայական գումար ներդնելով՝ որակը չի վերահսկվում:
«Մենք մեր միջոցները արդյունավետ չենք օգտագործում: Կա կառավարման թերություն, կառուցվածքի թերություն: Բուժհիմնարկի գումարները գոյանում են այն փոքրաթիվ գումարներից, որ ինքը կարողանում է աշխատել հիվանդին բուժելով, և դա պետք է ծախսել դեղորայքի, աշխատավարձի, կոմունալի և այլ հարցերի վրա: Որքան մենք անարդյունավտ ծախսեր ենք ունենում, բուժհիմնարկն ու բուժաշխատողներն են տուժում: Բուժաշխատողը մեղավոր չէ, որ մենք՝ կազմակերպիչներս, չենք ստեղծել մեխանիզմներ, որ բուժաշխատղը նորմալ վարձատրվի»,- ասել է նախարարը՝ ընդգծելով համաֆինանսավորման կարևորությունը:
Նշենք, որ մեր հանրապետությունում դեղերի ներկրմամբ զբաղվում է շուրջ 50 կազմակերպություն: