«Երբ նման հայտարարություններ անում են հատկապես Սեմնեբին և Բրայզան, իսկ հանդիպումը կայանալու է Սոչիում` ՌԴ տարածքում, իսկ նախաձեռնությունը Մեդվեդևինն է, ցույց է տալիս, որ դժվար թե Սոչիում որևէ բան տեղի ունենա»,- «Առաջին լրատվականի» հետ զրույցում կարծիք հայտնեց ԼՂՀ նախկին արտգործնախարար Արման Մելիքյանը` անդրադառնալով Փիթեր Սեմնեբիի և Մեթյու Բրայզայի հայտարարություններին:
Նշենք, որ Հարավային Կովկասում ԵՄ նախկին հատուկ ներկայացուցիչ Փիթեր Սեմնեբին հայտարարել է, որ ԼՂ հակամարտության կարգավորման ուղղությամբ նշանակալի քայլեր կարվեն, այն էլ` շատ մոտ ապագայում:
Մելիքյանի գնահատականներով, այդ ամենը չափազանցված հույսեր ներշնչելու մոտեցում է. «Սա միջազգային մրցակցության դրսևորում է, և նրանք հույսեր են արտահայտում նախքան հանդիպումը, ինչը էլ ավելի կշեշտի հիասթափությունը, եթե այդ հույսերը չարդարանան, և դա արդեն կախված կլինի Ռուսաստանից»:
Հարցին, թե հնարավո՞ր է, որ այս հայտարարությունները միտված են նրան, որպեսզի նախաձեռնությունը Ռուսաստանի ձեռքից վերցնեն մյուս միջնորդները, Մելիքյանը պատասխանեց. «Չեմ կարծում, նրանք կարող են նախաձեռնությունը հանձնել ռուսներին և անհաջողության համար մեղքը բարդել ռուսների վրա»: