Թուրքական Cihan լրատվական գործակալության փոխանցմամբ՝ վերջին 30 տարիներին Թուրքիայի դեմ պատերազմ մղող Քրդստանի աշխատավորական կուսակցության (PKK) դաշնակից «Դեմոկրատական միություն» կուսակցությունը (PYD) Թուրքիայի սահմանին մոտ ընկած քաղաքներում շարունակում է իր «սադրիչ» գործողությունները:
Մարդինի նահանգի Նուսայբինի շրջանից ընդամենը 15 կիլոմետր հեռավորության վրա PYD-ն հայտարարել է երեկվանից սկսած «Քուրդիստանի ժողովրդական բրիգադներ» բանակի ստեղծման մասին: PYD-ի հաղորդմամբ՝ դա պետության ստեղծման ուղղությամբ կատարված առաջին քայլն է:
PYD-ն հայտարարել է, որ Սիրիայում ընթացող ներքին բախումների ֆոնին «Քուրդիստանի ժողովրդական բրիգադներ» բանակը կապահովի քրդական հոծ բնակչություն ունեցող շրջանների անվտանգությունը:
