ԱՄՆ հատուկ ծառայությունների ղեկավարությունը պաշտոնապես արգելել է իր աշխատակիցներին ալկոհոլ օգտագործել ծառայության մեջ գտնվելիս: Ինչպես հաղորդում է The Washington Post-ը, նոր ցուցումները միայն ամրապնդում են նախկինում եղած կանոնները: Այսուհետ գործակալներին արգելվում է օգտագործել ցանկացած տեսակի ալկոհոլային խմիչք ոչ միայն աշխատանքի ընթացքում, այլև աշխատաքի ներկայանալուց 10 ժամ առաջ: Գործուղման ժամանակ արգելվում է ալկոհոլ խմել հյուրանոցներում և այլ վայրերում, որտեղ կանգ են առնում նախագահը և այլ բարձրաստիճան պաշտոնյաներ:
«Ալկոհոլ թույլատրվում է օգտագործել միայն չափավոր քանակով ոչ ծառայողական ժամի»,- ասվում է հրահանգում:
Գաղտնի ծառայությունների ղեկավար Մարկ Սալիվանի կարծիքով՝ նոր հրահանգները կնպաստեն Կոլումբիայում տեղի ունեցած միջադեպի նման իրավիճակներից խուսափելուն:
Հիշեցնենք. ապրիլին հաղորդվում էր, որ ԱՄՆ նախագահ Բարաք Օբամայի այցը Կոլումբիա նախապատրաստող հատուկ ծառայությունների գործակալները և Պենտագոնի զինծառայողներ զվարճացել են տեղի մարմնավաճառների հետ:
