Սիրիան, ըստ էության, այժմ վերածվել է ծայրահեղականների միջև մարտադաշտի: Նման կարծիք է հայտնել ամերիկյան Heritage հիմնադրամի փորձագետ Արիել Քոհենը՝ խոսելով Մերձավոր Արևելքում տիրող իրավիճակի մասին:
«Ըստ էության, դա մարտի դաշտ է Լիբանանում և Իրանում «Հըզբոլլահի» հետ կապված արմատական տարրերի և ծայրահեղ իսլամիստական սուննիական ուժերի միջև, ինչպիսիք են «Ալ-Քաիդա»-ի զինյալները, որոնք Սիրիա են գալիս Իրանից, Պարսից ծոցի երկրներից, Եգիպտոսից և այլն»,- ասել է Քոհենը, որի խոսքերը մեջբերում է ադրբեջանական Trend գործակալությունը:
Նրա խոսքերով՝ դա աղետալի երևույթ է, քանի որ արդյունքում զոհվում են խաղաղ մարդիկ:
Քոհենը հիշեցրել է, որ Սիրիայի բնակչության մեծ մասը կազմում են սուննիները, որոնց կարծիքով՝ իրենք խտրականության են ենթարկվում, ուստիև պայքարում են Ասադի վարչակարգի դեմ:
«Իսկ վարչակարգն իր հերթին սեփական ժողովրդի դեմ կիրառում է ծանր հրազեն, այդ թվում՝ ինքնաթիռներ և հրետանի»,- ասել է Քոհենը:
Նրա խոսքերով՝ ի վերջո, Սիրիայում շարունակվող արյունահեղությունը կհանգեցնի երկրի էլ ավելի ծայրահեղականացմանը:
