Հանրահայտ ֆրանսիացի դերասան Ալեն Դելոնը դեկտեմբերի 17-ին կժամանի Երևան: «Արմենիա փրոդաքշնի» գլխավոր պրոդյուսեր Վալերի Սահարյանը PanARMENIAN.Net-ի հետ զրույցում ասել է,որ ճանաչված դերասանը դեկտեմբերի 18-ին «Մոսկվա» կինոթատրոնում ներկա կգտնվի իր մասնակցությամբ «Շնորհավոր Նոր տարի, մայրիկներ»(«С новым годом, Мамы!») ֆիլմի պրեմիերային: Ֆիլմի ցուցադրությունները կինոթատրոնում կմեկնարկեն դեկտեմբերի 27-ից:
Սահարյանի խոսքով, Դելոնի հետ միասին Երևան կժամանեն նաև ֆիլմի դերասանական կազմի ևս մի քանի դերասաններ, այդ թվում Պավել Վոլյան, Ելիզավետա Բոյարսկայան, Կոնստանտին Կրյուկովը և այլք:
Ֆիլմի պրոդյուսերներն են Ղևոնդ Անդրեասյանը, Գեորգի Մալկովը, իսկ համապրոդյուսերը Վալերի Սահարյանն է:
«Շնորհավոր Նոր տարի, մայրիկներ» ֆիլմը 5 տարբեր ռեժիսորների` Սարիկ Անդրեասյանի, Դմիտրի Գրաչովի, Արտյոմ Մաքսիմենկոյի, Անտոն Բորմատովի և Կլիմ Պոպլավսկու նովելներից բաղկացած կինոալմանախ է: Ռոմանտիկ կատակերգության հիմնական մասը նկարահանվել է Ռուսաստանում, իսկ Ալեն Դելոնի մասը` Ֆրանսիայում: Ֆիլմի գլխավոր թեման մայրերի հանդեպ սերն է. գլխավոր հերոսուհին փորձում է իրականացնել իր մոր երազանքը, որն ամբողջ կյանքում երազել է տեսնել Ալեն Դելոնին: Հերոսուհին կազմակերպում է այցը Փարիզ, որտեղ էլ նրա մայրը պատահական հանդիպում է Ալեն Դելոնին: Ֆիլմի բյուջեն կազմել է 6 միլիոն դոլար, տևողությունը 90 րոպե է:
Մոսկովյան պրեմիերան տեղի կունենա մեկ օր անց` դեկտեմբերի 19-ին:
