Ինչպես տեղեկացնում է ՄԱԿ-ի Հայաստանյան գրասենյակի հանրային տեղեկատվության վարչությունը, ՄԱԿ-ի գրասենյակում այսօր մեկնարկեցին երկկողմ քննարկումները Հայաստանի և Վրաստանի պետական սահմանի կառավարման ոլորտի մարմինների ներկայացուցիչների մասնակցությամբ: Երկօրյա այս միջոցառումը կազմակերպվել է Եվրամիության կողմից ֆինանսավորվող և ՄԱԿ-ի Զարգացման ծրագրի (ՄԱԶԾ) կողմից իրականացվող <<Հարավային Կովկասում սահմանների համալիր կառավարում>> (ՀԿՍՀԿ) ծրագրի շրջանակներում և նվիրված է հայ-վրացական սահմանին Սահմանային համագործակցության միջպետական պիլոտային կենտրոնի (ՍՀՄԿ) ստեղծման հետ կապված հարցերին:
Միջոցառման ընթացքում հայ և վրացի մասնակիցները հնարավորություն կունենան քննարկել 2011թ. նոյեմբերի 30-ին ՀՀ կառավարությանն առընթեր ազգային անվտանգության ծառայության և Վրաստանի ներքին գործերի նախարարության միջև ստորագրված սահմանային համագործակցության մասին համաձայնագրի դրույթները, ինչպես նաև ուրվագծել հայ-վրացական սահմանի <<Բագրատաշեն/Սադախլո>> պետական սահմանի անցման կետում ՍՀՄԿ ստեղծման հետ կապված իրավական հիմքերը` հաշվի առնելով քաղաքական, վարչարարական և կազմակերպչական հարցերը:
Քննարկումներին ելույթներով հանդես եկան ՄԱԶԾ մշտական ներկայացուցչի տեղակալ պարոն Դիրք Բոբերգը և Ֆրանսիայից ժամանած փորձագետներ Քրիստոֆ Ռենոն և Ժան-Էմանուէլ Գալզին:
Բացման իր խոսքում պարոն Բոբերգն ընդգծեց ՄԱԶԾ պատրաստակամությունը շարունակելու Հայաստանում սահմանների համալիր կառավարման համակարգի ներդրմանն, ինչպես նաև Վրաստանի հետ սահմանային համագործակցության ընդլայնմանն ուղղված օժանդակությունը, մասնավորապես` սահմանային համագործակցության միջպետական նման կենտրոնների ստեղծման միջոցով:
ՀԿՍՀԿ ծրագրի ընդհանուր նպատակն է Հարավային Կովկասի երկրների, ԵՄ անդամ-պետությունների և միջազգային կառույցների միջև միջգերատեսչական, երկկողմ և տարածաշրջանային համագործակցության ընդլայնումն ու զարգացումը` ուղղված ապրանքների և մարդկանց օրինական տեղաշարժի ապահովմանը և միաժամանակ` ցանկացած ապօրինի գործունեությունից պետական սահմանի պաշտպանվածությանը
