«Ազատություն» ռադիոկայանի ռուսական ծառայության փոխանցմամբ՝ Վրաստանի ԿԸՀ-ն հաշվարկել է ընտրատեղամասերից եկած տվյալների 18.48 տոկոսը: Ընդդիմադիր «Վրացական երազանք» դաշինքը հավաքել է քվեների 53.34 տոկոսը, իսկ իշխող «Միասնական ազգային շարժում» կուսակցությունը՝ 41.56 տոկոսը:
Մնացած կուսակցություններին չի հաջողվել հաղթահարել խորհրդարան մուտք գործելու համար սահմանված 5 տոկոսանոց շեմը: Ներկայիս դրությամբ, մշակվել են 3766 ընտրատեղամասերից 693-ի տվյալները: Նշվում է, որ երբ անցած գիշեր ԿԸՀ նախագահ Զուրաբ Խարատիշվիլին ներկայացրել է առաջին արդյունքները, ԿԸՀ-ն բախվել է համակարգչային խնդրի:
Սկզբնական շրջանում մոնիտորների վրա հայտնվել են մի տվյալներ, ապա՝ մեկ այլ տվյալներ: Խարատիշվիլին չի բացառել, որ Վրաստանի ԿԸՀ-ի կայքի վրա ցանցահենային հարձակում է իրականացվել: ԿԸՀ-ի աշխատակիցները շուտով հայտարարել են, որ կայքի աշխատանքը խաթարվել է նրա մեծ ծանրաբեռնվածության պատճառով, քանի որ կայքն այդ ժամանակ ունեցել է բավական շատ այցելուներ:
ԿԸՀ-ը նախագահը հավելել է, որ Խաշուրի քաղաքի մի շարք ընտրատեղամասերում ընտրությունների արդյունքները կարող են չեղյալ հայտարարվել: Այստեղ բախումներ են գրանցվել ոստիկանության ու տեղաբնակների միջև: Նշվում է, որ հատուկջոկատայիններն այստեղ փոխել են ընտրական արձանագրությունները:
