Ազգային ժողովի ՀՅԴ խմբակցությունը դեմ կքվեարկի ԱԺ ԲՀԿ-ական պատգամավոր Վարդան Օսկանյանին անձեռնմխելիությունից զրկելու մասին ՀՀ գլխավոր դատախազ Աղվան Հովսեփյանի ներկայացրած միջնորդագրին: Այս մասին ԱԺ-ում այսօր հայտարարեց ԱԺ ՀՅԴ պատգամավոր Աղվան Վարդանյանը:
«Մենք մեր գործընկերոջը չենք հանձնի: Հանձնելով Օսկանյանին` յուրաքանչյուրը պատասխան պիտի տա իր խղճի և ժողովրդի առաջ»,- ասաց նա:
Վարդանյանի խոսքով` կա միայն գլխավոր դատախազի միջնորդությունը, սակայն բացակայում է Օսկանյանի մեղքի ապացույցը: «Եթե հաշվի առնենք, որ Հանթսման ընտանիքը և «Սիվիլիթաս» հիմնադրամը հայց չեն ներկայացրել, ապա ակնհայտ է, որ Վարդան Օսկանյանը մեղավոր չէ: Այնպես որ` իմ գործընկերներին կոչ եմ անում ամեն դեպքում քվեարկել խղճի մտոք»,- նշեց խորհրդարանականը:
Դաշնակցական մեկ այլ պատգամավոր՝ Արծվիկ Մինասյանն իր հերթին նկատեց, որ «Սիվիլիթաս»-ի հարցը նախ` պետք է քննարկվեր պետաիրավական հանձնաժողովում: «Ակնհայտ է, որ հարցը քաղաքական լուծում է պահանջում: Սա քաղաքական հստակ հետապնդում է Վարդան Օսկանյանի անձի հանդեպ: Բայց մինչև ո՞ւր պիտի այսպես գնանք: Եկեք այս հարցով չխայտառակենք Հայաստանի միջազգային վարկը: Եվրոպական կառույցներում հայտնվելու պարագայում այս գործը հերթական ապտակը կլինի մեր երկրին: Կարծում եմ՝ ամենաողջամիտ տարբերակը Օսկանյանին պատգամավորական անձեռնմխելիությունից զրկելու մասին ՀՀ գլխավոր դատախազի միջնորդությունը հետ կանչելն է»,- ասաց Մինասյանը:
Հիշեցնենք, որ ԲՀԿ պատգամավոր Նաիրա Զոհրաբյանն այսօր հայտարարել է, որ Օսկանյանի հետապնդումը քաղաքական պատվեր է, որի մասին իրենք կհայտնեն միջազգային բոլոր կառույցներին, մասնավորապես` վաղը, ԵԽԽՎ-ի աշնանային նստաշրջանում:
