ԱՄՆ-ում հեռուստատեսությունը շարունակում է մնալ լրատվության գլխավոր աղբյուրը, սակայն հեռուստանորությունների լսարանը նկատելիորեն ծերանում է: Այս մասին ասված է Pew Research Center-ի հետազոտությունում:
Հետազոտական կենտրոնը սոցհարցումներ է անցկացրել՝ պարզելու, թե մասնակիցները ինչպես են տեղեկանում օրվա իրադարձություններին: 55 տոկոսը պատասխանել է, որ լուրերին ծանոթանում է հեռուստատեսությամբ, 33 տոկոսը՝ ռադիոյով, 29 տոկոսը՝ թերթերից: Հարցվածների կեսը լուրեր կարդալու համար օգտագործում են համակարգիչներն ու բջջային հեռախոսները:
Նրանք ոչ միայն կարդացել են թերթերի էլեկտրոնային տարբերակները, այլև նորություններ ստացել փոստով, Twitter-ի և այլ սոցցանցերի միջոցով:
Լուրերին հեռուստատեսությամբ հետևող մարդկանց բաժնեմասը շարունակում է լինել 50 տոկոսից ավելի, սակայն 60-ից ցածր՝ վերջին տասնամյակում: 90-ականներին հեռուստատեսությանը բաժին էր ընկնում լրատվությանը հետևող լսարանի 70 տոկոսը:
Երիտասարդների շարքում (18-24 տարեկան) հեռուստատեսությամբ լուրերը դիտել է հարցվածների 29 տոկոսը: 25-29 տարիքային խմբում լսարանը կազմել է 41 տոկոս, 30-39 տարեկանների շարքում՝ 47 տոկոս: Երիտասարդների շարքում հարցվածների միայն 6 տոկոսն է լրատվությանը ծանոթացել տպագիր մամուլից:
Դեռահասների 29 տոկոսը պատասխանել է, որ ընդհանրապես չի հետաքրքրվում լրատվությամբ: 11 տոկոսը օգտվում է ավանդական մեդիայից, 28 տոկոսը՝ թվայինից: Մնացած 32 տոկոսը կիրառում է և´թվայինը, և´ ավանդականը: Ընդհանուր առմամբ՝ ԱՄՆ-ում լրատվությամբ չհետաքրքրվողների թիվը կազմում է 17 տոկոս, 33 տոկոսը օգտվում է ավանդական մեդիայից, 12-ը՝ թվայինից, իսկ 38 տոկոսը՝ տարբեր:
