Վենեսուելայի նախագահ Ուգո Չավեսը հայտարարել է, որ կքվեարկեր Բարաք Օբամայի օգտին, եթե ԱՄՆ-ի քաղաքացի լիներ: Այս մասին հաղորդում է Agence France-Presse-ը:
Չավեսի կարծիքով` Օբաման էլ իր հերթին կքվեարկեր վենեսուելացի առաջնորդի վերընտրման համար, եթե մեծացած լիներ Կարակասի բանվորական թաղամասում:
«Օբաման վերջերս ասել է մի շատ արդարացի և ողջամիտ բան` Վենեսուելան սպառնալիք չի ներկայացնում ԱՄՆ-ի շահերին»,- հիշեցրել է Վենեսուելայի նախագահը` հավելելով, որ իր ամերիկացի գործընկերը «հաճելի տղա» է:
Վենեսուելայի և ԱՄՆ-ի նախագահների վերընտրման դեպքում կարող է սկսվել հարաբերությունների կարգավորման նոր շրջան` նշել է Չավեսը: Վենեսուելայի նախագահական ընտրությունները կանցկացվեն հոկտեմբերի 7-ին, իսկ ամերիկացիները պետության ղեկավար կընտրեն նոյեմբերի 6-ին:
Չնայած Չավեսի ջերմ խոսքերին, գործակալությունը նշում է, որ երկու երկրների հարաբերությունները լարված են մնում, իսկ 2010 թվականից ամերիկացի և վենեսուելացի դեսպանները Կարակասում և Վաշինգտոնում համապատասխանաբար չեն աշխատում:
Չավեսն իշխանության ղեկին է 1999 թվականից, իսկ Օբաման` 2008-ից:
