Վրաստանի ներքին գործերի նախարարությունն այսօր` խորհրդարանական ընտրությունների մեկնարկից ժամեր առաջ, արտակարգ հայտարարություն է տարածել այն մասին, որ շրջաններում իրականացվում է «գումարների զանգվածային բաշխում»: Այս մասին հայտնում է «Новости – Грузия» գործակալությունը:
«ՆԳՆ-ն տեղեկությունն է ստացել գումարների զանգվածային բաշխման փաստերի մասին: Համաձայն այդ տեղեկության`գումարը բաժանող անձինք գործում են կոնկրետ քաղաքական սուբյեկտի անունից: Ոստիկանությունը ճշտում է այդ տեղեկությունը»,- ասվածէ հայտարարությունում:
ՆԳՆ-ն կոչ է անում կուսակցություններին վերահսկել իրենց ներկայացուցիչներին` խուսափելու համար օրենքի կոպիտ խախտումից:
«Հաշվի առնելով այն փաստը, որ այսօր ընտրություններ են, ոստիկանությունը զերծ է մնում կուսակցական ներկայացուցիչներին հարցաքաննության կանչելուց»,- ասված է հայտարարությունում:
Ավելի վաղ Վրաստանի իշխանությունները պնդել էին, որ որոշ քաղաքական ուժեր ֆինանսավորվում են հանցավոր կառույցների և Ռուսաստանի կողմից: Ընդդիմադիրները հերքել են այդ մեղադրանքները:
