Չնայած որոշ ապրանքատեսակների գնաճին` Գյումրու անշարժ գույքի շուկայում գները նվազել են: Ներկայումս միայն անշարժ գույքի գործակալություններից վաճառքի է հանված շուրջ 600 բնակարան: Գործակալությունների տվյալներով, մոտ 10 անգամ պակասել է գնորդների թիվը: Մասնագետները սա հիմնականում պայմանավորում են երկրում առկա սոցիալ-տնտեսական իրավիճակով: Ի տարբերություն մայրաքաղաքի, Գյումրիի կենտրոնական թաղամասերից մեկում 30.000 դոլարով կարելի է գնել վերանորոգված, ջեռուցվող 3-սենյականոց բնակարան:
Մինչև 2008 թվականը Գյումրիում բնակարանների առք ու վաճառքի գները սեզոնային բնույթ էին կրում: Գնաճի բարձր ցուցանիշ գրանցվում էր աշնանը, երբ արտագնա աշխատանքից վերադառնում էին խոպանչիները: Անշարժ գույքի գործակալությունների փորձագետները կանխորոշում են, որ շուրջ երկու տարի հետո կրկին սեզոնային բնույթը կարող է գործոն հանդիսանալ բնակարանների առք ու վաճառքի շուկայում: Իսկ առայժմ այս ոլորտը միակն է, որ զերծ է մնացել համընդհանուր գնաճից: Գյումրեցիները, մի խոսքով, հրավիրում են Գյումրի` մատչելի գնով հարմարավետ բնակարան ձեռք բերելու: Սրանով նաև միգրացիայի խնդիր են լուծում: