Անգլիական «Ուիգան»-ի գլխավոր մարզիչ Ռոբերտո Մարտինեսը մտադրվել է DVD-ի միջոցով ապացուցել այն փաստարկը, որ մրցավարները սխալ գործողություններ են կատարել «Մանչեսթեր Յունայթեդ»-ի դեմ խաղերում: Սա, ի դեպ, վերաբերում է ոչ թե մեկ, այլ միանգամից մի շարք հանդիպումների: Մարզիչն ուզում է ապացուցել, որ մրցավարները «Ուիգան» – «Մանչեսթեր Յունայթեդ» խաղը միշտ սարսափելի են վարում:
Նշենք, որ Անգլիայի ֆուտբոլի ասոցիացիան կարգապահական տույժ էր կիրառել Մարտինեսի հանդեպ այն բանից հետո, երբ նա «Ուիգան» – «Մանչեսթեր Յունայթեդ» խաղից հետո հայտարարել էր, որ մրցավարների գործողությունների արդյունքում իր թիմը տուժել է:
Մարտինեսը չի համաձայնում Անգլիայի ֆուտբոլի ասոցիացիայի կայացրած որոշմանը՝ ցանկանալով ապացուցել իր անմեղությունը:
«Խոսելով Մայքլ Օլիվերայի մասին՝ ամենևին էլ չեմ ասում, թե նա պաշտպանել է ինչ-որ մեկին կամ օգնել է «Մանչեսթեր Յունայթեդ»-ին. ուղղակի փաստում եմ «Օլդ Թրաֆորդ»-ում տեղի ունեցած վերջին չորս հանդիպումների գործողությունները:
Մենք կապացուցենք, որ մրցավարը սխալ որոշումներ է կայացրել: Բանն այն է, որ «Օլդ Թրաֆորդ»-ում տեղի ունեցած վերջին չորս խաղերին մրցավարը մեր օգտին որոշում չի կայացրել:
«Օլդ Թրաֆորդ»-ում, «Սթեմֆորդ Բրիջ»-ում, «Էմիրեյթս»-ում խաղալն առանց այն էլ բարդ է, իսկ երբ մրցավարները ի վնաս մեզ որոշումներ են կայացնում, մեկ միավոր ձեռք բերելը դառնում է առավելագույն արդյունք»,- Մարտինեսի խոսքերն է մեջբերում Daily Mail-ը:
