Մարտի երկուսին ԱՄՆ կոնգրեսի միջազգային ահաբեկչության, սպառազինությունների չտարածման ու առևտրի հանձնաժողովում կայացել են լսումներ, որոնց ընթացքում դեմոկրատ կոնգրեսական Բրեդ Շերմանը ԱՄՆ պետքարտուղարի Հիլարի Քլինթոնից պահանջել է Ադրբեջանի կառավարությանը զգուշացնել Հայաստանի դեմ ռազմական գործողությունների սպառնալիքների կիրառման համար. տեղեկացնում է Huliq.com կայքը:
Լսումների ընթացքում նա մի շարք հարցեր է ուղղել պետքարտուղարին` կապված Մերձավոր Արևելքի, Չինաստանի և այլ տարածաշրջանների մասին, իսկ Կովկասի մասով ասել է.
«Ինչ վերաբերում է Կովկասին, Ադրբեջանի պաշտպանության նախարարը վերջերս հայտարարել էր, որ իրենք լրջորեն պատրաստվում են պատերազմի: Հույս ունեմ, որ հաշվի կառնեք, թե ինչ լուրջ հետևանքների կարող է հանդիպել Ադրբեջանը ղարաբաղյան պատերազմի վերսկսման դեպքում»:
Նախատեսվում է, որ Քլինթոնը լսումների պատասխանները ներկայացնելու է գրավոր: