ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ Ազգային ժողովի փոխնախագահ Էդուարդ Շարմազանովը սեպտեմբերի 28-ին հանդիպել է Երևանի պետական համալսարանի իրավաբանության ֆակուլտետի ուսանողների հետ:
Ողջունելով ուսանողների այցը խորհրդարան` Էդուարդ Շարմազանովը նրանց հրավիրեց ազատ ու անկաշկանդ զրույցի` նշելով, որ Ազգային ժողովը, որպես Հայաստանի Հանրապետության բարձրագույն ներկայացուցչական մարմին, մեծ ուշադրություն է դարձնում երիտասարդության հետ աշխատանքին:
«Երիտասարդությունը մեր ներկան է, ոչ միայն ապագան: Եվ այն հասարակությունները, որոնք չեն գիտակցում սա, տխուր ապագա են ունենում: Մենք միշտ ցանկություն ունենք տարբեր օրենսդրական նախաձեռնություններ, երկրում տիրող վիճակը, քաղաքական կարևորագույն հարցեր քննարկելու մեր երիտասարդ գործընկերների հետ»,- նշեց ԱԺ փոխնախագահը: Նա տեղեկացրեց, որ արդեն չորրորդ տարին է, ինչ Ազգային ժողովում հանդիպումներ են կազմակերպվում տարբեր բուհերի ուսանողների, ավագ դպրոցի աշակերտների, հասարակական կազմակերպությունների երիտասարդ ներկայացուցիչների հետ:
Այդ հանդիպումների և առհասարակ երիտասարդության հետ տարվող աշխատանքի մասին առավել մանրամասն ապագա իրավաբաններին ներկայացրել է ԱԺ նախագահի խորհրդական Սերգեյ Լոքյանը, ով ևս մասնակցել է հանդիպմանը: Խոսելով նաև Երիտասարդական խորհրդարանի կազմավորման արդեն մեկնարկած գործընթացից՝ ԱԺ նախագահի խորհրդականը կոչ է արել երիտասարդներին ակտիվ լինել և փորձել ներգրավվել այդ աշխատանքներում:
Այնուհետև ուսանողների ամենատարբեր հարցերին պատասխանել է ԱԺ փոխնախագահ Էդուարդ Շարմազանովը: Նրանց մասնավորապես հետաքրքրում էին բուհերում պետպատվերով ուսուցման տեղերի, աշխատաշուկայի, տարբեր մասնագիտությունների պահանջարկի հետ կապված հարցեր: Էդուարդ Շարմազանովը ԵՊՀ իրավաբանության ֆակուլտետի ուսանողներին հորդորել է քայլել ժամանակին համընթաց և լինել այն սերունդը, որը կսկսի այլ կերպ նայել մասնագիտության ընտրության հարցին, կառաջնորդվի իրական պահանջարկով և ոչ թե «նորաձևությամբ»:
Ուսանողների խնդրանքով, ԱԺ փոխնախագահն անդրադարձել է նաև Հայաստանի ներքաղաքական և արտաքին քաղաքականությանն առնչվող մի շարք հարցերի, որոնք վերաբերում էին մասնավորապես Լեռնային Ղարաբաղի Հանրապետության միջազգային ճանաչմանը, Հայաստան-Արցախ միջխորհրդարանական կապերին, Ադրբեջանի հակահայկական գործողություններին, անգամ՝ Արևելյան և Արևմտյան Հայաստանները միավորված տեսնելու երազանքին: Վերջին հարցի հետ կապված՝ Էդուարդ Շարմազանովը երիտասարդներին խորհուրդ է տվել երբեք չկորցնել երազանքը, լինել նպատակասլաց, քանի որ, ինչպես համոզված է ԱԺ փոխնախագահը, չկան պատեր, որ մեծ ցանկության դեպքում հնարավոր չլինի քանդել:
