Գլխավոր դատախազությունը տեղեկացնում է, որ Ազգային ժողովի պատգամավոր Զարուհի Փոստանջյանի եղբորը` Տիգրան Փոստանջյանին, «Երևան-Կենտրոն» քրեակատարողական հիմնարկից (ՔԿՀ) «Նուբարաշեն» ՔԿՀ տեղափոխելու համար հիմք է ծառայել Ազգային անվտանգության ծառայության (ԱԱԾ) քննչական մարմնի գրությունը: Այս մասին հաղորդում է «Ազատություն» ռ/կ-ն:
Հիշեցնենք, որ Արաբկիրի թաղապետարանում որպես առաջատար մասնագետ աշխատող Տիգրան Փոստանջյանը ձերբակալվել է փետրվարի 23-ին: Նա կասկածվում է 100 հազար դրամ ապօրինի վարձատրություն ստանալու մեջ: Փետրվարի 25-ին դատարանը որոշեց նրա նկատմամբ իբրև խափանման միջոց կալանքն ընտրել:
Գլխավոր դատախազության հասարակայնության հետ կապերի վարչության պետ Շահեն Տոնոյանը «Ազատություն» ռադիոկայանի հետ զրույցում չի մանրամասնել, թե ինչ հիմքեր է վկայակոչել ԱԱԾ-ն: Նա ասել է, որ մի շարք հանգամանքների թվում հաշվի են առնվել նաև միջազգային կառույցների հորդորները:
«Բացի այդ, իրենց հարազատների, շահերի ներկայացուցչի, փաստաբանի հայտարարությունից, որ նրան այնտեղ միտումնավոր են պահում ճնշումներ կիրառելու նպատակով և այլն, այդ հարցով նաև միջազգային կազմակերպություններ են դիմել` խնդրելով, որ եթե օրենքը թույլատրում է, իրեն տեղափոխեն այլ մեկուսարան», – ասում է Շահեն Տոնոյանը:
Հայաստանի գլխավոր դատախազ Աղվան Հովսեփյանը երկուշաբթի օրը հանդիպել էր ԵԱՀԿ երևանյան գրասենյակի ղեկավար Սերգեյ Կապինոսին: Պաշտոնական հաղորդագրության մեջ նշված է, որ այդ հանդիպմանը քննարկվել են Փոստանջյանի դեմ հարուցված քրեական գործի որոշ հանգամանքներ:
