Մեքսիկայի իրավապահ մարմինները լուրջ հարված են հասցրել երկրի ամենահզոր նարկոկարտելներից մեկին՝ «Լոս Սետաս»-ին: Ինչպես հաղորդում է RIA Novosti-ն՝ վկայակոչելով երկրի իշխանություններին, չորեքշաբթի երեկոյան ձերբակալվել է հանցավոր խմբավորման առաջնորդներից մեկը՝ Իվան Վելասկես Կաբալիերոն, որը հայտնի է «Թալիբան» մականունով:
Վելասկես Կաբալիերոն 37 առավել փնտրվող նարկոկարտելների առաջնորդների ցուցակում էր, որը կազմվել էր երկրի նախագահ Ֆելիպե Կալդերոնի կողմից 2006 թ., երբ նա պատերազմ հայտարարեց նարկոմաֆիային: Ավելի վաղ նրան բռնելու գործում օգնության համար Մեքսիկայի իշխանությունները խոստացել էին 30 մլն պեսո պարգև (2.4 մլն դոլար):
Նախնական տվյալներով՝ «Թալիբանը» ձերբակալվել է երկրի կենտրոնում՝ Սան Լուիս Պոտոսի քաղաքում, ծովային հետևակի ստորաբաժանումների կողմից: Նա համարվում է նարկոկարտելի հիմնադիրներից մեկը:
«Լոս Սետաս»-ը ձևավորվել է էլիտար բանակային ստորաբաժանումների նախկին աշխատակիցներից: Նարկոկարտելը կասկածվում է վերջերս Պիեդրաս Նեգրաս քաղաքից 131 բանտարկյալների փախուստը կազմակերպելու մեջ: Առայժմ փախուստի դիմածներից իշխանությունները կարողացել են բռնել միայն մի քանիսին:
