Անցյալ տարվա փետրվարին Լեռնային Ղարաբաղի Հանրապետության զորամասերից մեկում շարքային զինծառայողներ Մարգար Դավթյանը, Տարոն Սուվարյանը և Վահե Աղաջանյանը սպայի հետ իրենցից մեկի ծնունդը նշելուց հետո, ոգելից խմիչքի ազդեցության տակ ծեծի էին ենթարկել համածառայող Գևորգ Կոծինյանին, ինչի հետևանքով վերջինս մահացել էր: Դատարանը պատժել է հանցագործներին` դատապարտելով համապատասխանաբար` 11 տարի 6 ամիս, 11 տարի և 11 տարի ազատազրկման:
Հետաքրքիր է, որ շարքային զինծառայողների նկատմամբ նման դատավճիռ կայացնելով` դատարանը, սակայն, համաներում է կիրառել սպայի նկատմամբ և նրան ազատ արձակել դատական նիստերի դահլիճից այն դեպքում, երբ վերջինս, մասնակցելով խնջույքին, խմել էր զինծառայողների հետ ու չէր կանխել նրանց գործողությունները:
Տուժող կողմը 3 տիպի փոխհատուցում էր պահանջում դատարանից` հուղարկավորության և փաստաբանական ծախսերի փոխհատուցում (հատկապես որ գործը քննվել է Ստեփանակերտի դատարանում և նիստերին մասնակցելու համար փաստաբանները Վանաձորից-Ստեփանակերտ ճանապարհածախս են արել) և 5 միլիոն դրամ` որպես բարոյական վնասի փոխհատուցում: 3 պահանջն էլ Հայաստանի դատարանը մերժել է:
Տուժողի իրավահաջորդի ներկայացուցիչ, փաստաբան Կարեն Թումանյանը զինծառայող Գևորգ Կոծինյանին ծեծելով սպանելու գործն այժմ ուղարկել է Մարդու իրավունքների եվրոպական դատարան` Եվրոպական կոնվենցիայի 2-րդ և 3-րդ հոդվածների խախտման հիմքով. զինծառայողի մահվան փաստով խախտվել է պետության կողմից կյանքի պաշտպանության իրավունքը, և որպես առանձին խախտում` Եվրոպական դատարանում գանգատ բերող է ներգրավվել սպանված զինծառայողի մայրը, քանի որ որդու կորստով հոգեկան խնդիրներ է ունեցել ու տառապել:
