1978թ. այս օրը Երևանում ծնվեց Բուդապեշտում ադրբեջանցի զինծառայող Ռամիլ Սաֆարովի կողմից կացնահարված լեյտենանտ Գուրգեն Մարգարյանը:
Հայաստանի պետական ճարտարագիտական համալսարանում բակալավրի աստիճան ստանալուց հետո Գուրգեն Մարգարյանը զորակոչվում է Հայաստանի Հանրապետության Զինված ուժեր:
Զինվորական ծառայությունն ավարտելուց հետո մնում է ԶՈՒ-ում և դառնում Հայաստանի Հանրապետության պաշտպանության նախարարության սպա։
2004թ. փետրվարին Գուրգեն Մարգարյան մեկնում է Բուդապեշտ՝ մասնակցելու ՆԱՏՕ-ի «Գործընկերություն հանուն խաղաղության» ուսումնական ծրագրին։ 2004թ. փետրվարի 13-ին սպա Ռամիլ Սաֆարովը քնած ժամանակ կացնահարեց Մարգարյանին՝ հասցնելով 16 հարված:
Հունգարիայի դատարանը Ռամիլ Սաֆարովին դատապարտեց ցմահ բանտարկության` առաջին 30 տարիներին առանց ներման իրավունքի, սակայն ընթացիկ տարվա օգոստոսի 30-ին հունգարական իշխանությունները մարդասպանին արտահանձնեցին Ադրբեջան: Ադրբեջանի նախագահ Իլհամ Ալիևը նույն օրը հրամանագիր ստորագրեց Ռամիլ Սաֆարովին ներում շնորհելու մասին:
Գուրգեն Մարգարյանը թաղված է Եռաբլուրում: Այսօր ԵՊՀ «Երիտասարդ համալսարանականների միավորում» ՀԿ-ն ժ. 12:30-ին երթ կկազմակերպի դեպի Եռաբլուր` ի հիշատակ Գուրգեն Մարգարյանի: Երթի կազմակերպիչներից է նաև «Գուրգեն Մարգարյան» ՀԿ-ն:
