Իրանական Press TV հեռուստաալիքի փոխանցմամբ՝ Իրանի Իսլամական հեղափոխության պահակազորը ներկայացրել է «Շահիդ 129» իր նոր անօդաչու թռչող սարքը (ԱԹՍ): Այն նախատեսված է ռազմական գործողություններ վարելու և օդային հետախուզություն իրականացնելու համար:
Նշվում է, որ իրանական նոր ԱԹՍ-ն կարող է օդում գտնվել 24 ժամ և թիրախները խոցել 1700-2000 կիլոմետր հեռավորությունից: Բացի այդ, ԱԹՍ-ն հագեցած է հատուկ էլեկտրոնային սարքավորմամբ, օրինակ՝ տեսախցիկներով՝ աերոլուսանկարներ անելու և պատկերը ռեալ ժամանակի ռեժիմով փոխանցելու համար:
Իրանցի զինվորականներն ընդգծում են, որ «Շահիդ 129» ԱԹՍ-ը կբարձրացնի սահմանմերձ շրջաններից ու Պարսից և Օմանի ծոցերից ուղարկվող հետախուզական տվյալների որակը: Անկախ փորձագետները կարծում են, որ այս ԱԹՍ-ի հայտնվելը կապված է նրա հետ, որ Իրանի հակաօդային պաշտպանության ուժերը անցած տարի վայր գցեցին ամերիկյան RQ-170 Sentinel ԱԹՍ-ն:
Մասնագետները կարծում են, որ իրանցի կոնստրուկտորները կարող են «Շահիդ 129» ԱԹՍ-ի արտադրության ժամանակ օգտվել ամերիկյան RQ-170 Sentinel-ից, որը գրեթե անվնաս վիճակում հայտնվել էր իրանցի զինվորականների ձեռքում:
