Արդեն մի քանի օր է՝ մամուլում հայտնվում են հրապարակումներ, համաձայն որոնց ՆԱՏՕ-ն իբր պատրաստվում է ռազմական ինտերվենցիա կազմակերպել Լիբիայում: Մի մասը կարծում է, որ դա լիբիական ժողովրդին հետագա սպանդից փրկելու միտում ունի, մյուսը` համաշխարհային տնտեսական հետագա ճգնաժամը չխորացնելու, քանի որ Լիբիայում ծայր առած հուզումների պատճառով դադարեցվել է այդ երկրից գազի և նավթի արտահանումը, ինչն ազդել է վառելիքի գների վրա:
Մարտի 1-ին ԱՄՆ պաշտպանության նախարար Ռոբերտ Գեյթսը հայտարարել է, որ ՆԱՏՕ-ում միակարծիք չեն Մուամար Քադաֆիի դեմ այդ կազմակերպության հետագա գործողությունների առումով: Այս մասին հաղորդում է Associated Press գործակալությունը: Ըստ Գեյթսի, թեպետ ակտիվ գործողություններ նախատեսված չեն, սակայն քննարկվում են մի քանի տարբերակներ:
«Մենք պետք է լավ մտածենք` արդյոք իմաստ կա՞ մեր զինվորներին ուղարկել Մերձավոր Արևելքի ևս մի երկիր»,- ասել է նա:
Գեյթսը նաև ավելացրել է, որ ՆԱՏՕ-ի հնարավոր գործողությունները պետք է դիտարկել Աֆղանստանում այդ կազմակերպության գործողությունների վրա ազդելու համատեքստում:
Հիշեցնենք, որ ամերիկյան ռազմանավերը հայտնվել են Լիբիայի հյուսիսային սահմանների մոտ` Միջերկրական ծովի հարավային մասում, սակայն այս պահին կոնկրետ գործողությունների մասին չի խոսվում: Երեկ ՆԱՏՕ-ի հնարավոր գործողությունների մասին հանդես է եկել նաև Թուրքիայի վարչապետ Ռեջեփ Թայիփ Էրդողանը, որն «անհեթեթություն է անվանել այդ ամենը»:
