Շվեյցարիա-Հայաստան ընկերակցության համանախագահ Սարգիս Շահինյանը հարցին՝ որքանո՞վ է Հայաստանն անկախ անկախության ձեռք բերումից 21 տարի անց, նշեց, որ Հայաստանը որոշ բաներ ձեռք է բերել, բայց շատ ուրիշ բաներ ձեռք չի բերել: Նրա դիտարկմամբ՝ Հայաստանը վաղուց լիովին կախյալ է, քանի որ տնտեսական, սոցիալական օղակները, որոնք պետք է ի սկզբանե գործեին կենսադաշտ և քաղաքական դաշտ ստեղծելու նպատակով, ձախողվեցին և ձախողված են մինչ օրս:
Ձախողման պատճառը, ըստ նրա, այն է, որ ղեկավարությունը, ինչպես նաև ժողովուրդը պատրաստ չեղան քաղաքացիական պատասխանատվության՝ ժողովուրդն իբրև ժողովուրդ, ղեկավարությունն էլ որպես ղեկավարություն:
Սարգիս Շահինյանը Հայաստանի անկախությունից հետո միակ էական նվաճումը համարում է բանակը, բայց նույնիսկ բանակի մեջ ահռելի թերություններ է նկատում, որոնք այսօր անտեսվում են:
Տոնի կապակցությամբ Սարգիս Շահինյանը չի ցանկանում ոչ մի բան ասել, չի ուզում, որ այս տոնը ղեկավարության կողմից շահարկվի որպես մակերեսային ցուցանիշ, ինչը, դժբախտաբար, արվում է, թե` մենք անկախ ենք, հզոր ենք, ոչ մեկի կարիքը չունենք, որ մենք մեր նպատակներին հասանք, բայց մեծ հաշվով` դա այդպես չէ:
Սարգիս Շահինյանի կարծիքով` սխալները սկսվեցին հենց առաջին օրից. յուրաքանչյուր նախագահ ունեցավ իր դրական և բացասական կողմերը, սակայն նա ցավով նկատում է, որ վերջիններս գերազանցում էին երեք նախագահների դեպքում էլ, պարզապես մեկի մոտ` ավելի շատ, մեկի մոտ` ավելի քիչ: «Յուրաքանչյուրը մտածեց իր գրպանը լցնելու մասին, ոչ մեկը չփորձեց մաքուր և անկեղծ հարաբերություն ստեղծել եղած ռեսուրսների հետ»,- ասաց Սարգիս Շահինյանը:
Առաջին հերթին, ըստ նրա, իրար նկատմամբ վստահությունն է կորել: Բացի այդ` մարդիկ իրենք իրենց չկարողացան նույնացնել ղեկավարության հետ, ընդ որում՝ թե՛ իշխանության, թե՛ ընդդիմության, ընդդիմությունն էլ ահռելի սխալներ գործեց. «Մենք պետք է տեր լինեինք մեր ազգին, և մեր պետության տերը պետք է լիներ հայ անձը: Մենք տեր չենք մեր պետությանը` ուրիշներն են տեր. սա է իրականությունը»,- ասաց Սարգիս Շահինյանը:
Նրա խոսքով` Հայաստանը այսօր միջազգային իրավունքի սուբյեկտ է, ինչն ամենակարևոր իրողությունն է, և այսօր անհնար է Հարավային Կովկասում ռազմավարություն և քաղաքականություն վարել առանց Հայաստանի:
